DhūñDhne se yuuñ to is duniyā meñ kyā miltā nahīñ
sach agar pūchho to sachchā āshnā miltā nahīñ

aap ke jo yaar bante haiñ vo haiñ matlab ke yaar
is zamāne meñ muhibb-e-bā-safā miltā nahīñ

sīratoñ meñ bhī hai insānoñ kī bāham iḳhtilāf
ek se sūrat meñ jaise dūsrā miltā nahīñ

dair o kaaba meñ bhaTakte phir rahe haiñ raat din
DhūñDhne se bhī to bandoñ ko ḳhudā miltā nahīñ

haiñ pareshāñ aur hairāñ jaa.eñ to jaa.eñ kidhar
rāh-gum-gashtoñ ko manzil kā patā miltā nahīñ

bul-havas dil kī tarah har rañg hai sarf-e-shikast
laala o gul meñ bhī rañg-e-der-pā miltā nahīñ

hai yahāñ to sair-e-gulzār-e-ḳhayāl nau-ba-nau
haañ asīro ham ko mazmūñ kuchh nayā miltā nahīñ

roiye ronā zamāne kā to 'kaifī' kis ke paas
koī is dil ke sivā dard-āshnā miltā nahīñ

DhunDhne se yun to is duniya mein kya milta nahin
sach agar puchho to sachcha aashna milta nahin

aap ke jo yar bante hain wo hain matlab ke yar
is zamane mein muhibb-e-ba-safa milta nahin

siraton mein bhi hai insanon ki baham iKHtilaf
ek se surat mein jaise dusra milta nahin

dair o kaba mein bhaTakte phir rahe hain raat din
DhunDhne se bhi to bandon ko KHuda milta nahin

hain pareshan aur hairan jaen to jaen kidhar
rah-gum-gashton ko manzil ka pata milta nahin

bul-hawas dil ki tarah har rang hai sarf-e-shikast
lala o gul mein bhi rang-e-der-pa milta nahin

hai yahan to sair-e-gulzar-e-KHayal nau-ba-nau
han asiro hum ko mazmun kuchh naya milta nahin

roiye rona zamane ka to 'kaifi' kis ke pas
koi is dil ke siwa dard-ashna milta nahin