Warning: session_start(): open(/tmp/sess_dhm3ka0ab9hjv2jkmu118uk9h5, O_RDWR) failed: No space left on device (28) in /razi/eraazi/darbari/chunmun/index.php on line 15
main KHamushi ke jazire mein ek patthar tha

Subscribe to our newsletter and get our newest updates

Wali Alam Shaheen

  • Ghazal


main KHamushi ke jazire mein ek patthar tha


maiñ ḳhāmushī ke jazīre meñ ek patthar thā
magar sadāoñ kā relā mirā muqaddar thā

na jaane kaun thā kis ajnabī safar par thā
vo qāfile se alag qāfile ke andar thā

tamām shahr ko us kā pata milā mujh se
vo aa.ine meñ thā par aa.ine se bāhar thā

vo jā rahā thā samundar ko jhelne ke liye
araq araq sar-e-sāhil tamām manzar thā

khulā thā us ke liye qasr kā junūbī dar
magar vahāñ koī andar hī thā na bāhar thā

vo narm ret ke bistar pe jā ke leT gayā
khulī jo aañkh to chāroñ taraf samundar thā

ghirā huā thā vo bad-nāmiyoñ ke haale meñ
hasīñ kuchh aur bhī 'shāhīn' us kā paikar thā

main KHamushi ke jazire mein ek patthar tha
magar sadaon ka rela mera muqaddar tha

na jaane kaun tha kis ajnabi safar par tha
wo qafile se alag qafile ke andar tha

tamam shahr ko us ka pata mila mujh se
wo aaine mein tha par aaine se bahar tha

wo ja raha tha samundar ko jhelne ke liye
araq araq sar-e-sahil tamam manzar tha

khula tha us ke liye qasr ka junubi dar
magar wahan koi andar hi tha na bahar tha

wo narm ret ke bistar pe ja ke leT gaya
khuli jo aankh to chaaron taraf samundar tha

ghira hua tha wo bad-namiyon ke haale mein
hasin kuchh aur bhi 'shahin' us ka paikar tha


Source: Book : Be-nishaan (Pg. 209) Author : wali aalam Shahiin Publication : Dabistan-e-jadeed (1984) Edition : 1984

Leave a comment

+