Subscribe to our newsletter and get our newest updates

Talib Baghpati

  • Ghazal


mohabbat aag ban jati hai sina mein nihan ho kar


mohabbat aag ban jaatī hai siina meñ nihāñ ho kar
tamannā.eñ jalā detī haiñ dil chiñgāriyāñ ho kar

idhar bhī tum udhar bhī tum yahāñ bhī tum vahāñ bhī tum
ye tum ne kyā qayāmat kī nigāhoñ se nihāñ ho kar

samajhte haiñ jise manzil fareb-e-rāh-e-manzil hai
magar chup huuñ ye majbūrī sharīk-e-kārvāñ ho kar

unheñ bhī dāstān-e-hijr chupke se sunā hī dī
sukūn-e-shām-e-ġham ban kar sitāroñ kī zabāñ ho kar

sahar honī se pahle hī gulābī ho ga.e aañsū
shafaq phūlī hamārī dāstān-e-ḳhūñ-chakāñ ho kar

unheñ niiñd aa rahī hai yā mirī taqdīr sotī hai
thapakte haiñ kisī naale shab-e-ġham loriyāñ ho kar

nuqūsh-e-ārzū miT miT ke ubhre ḳhuun hone ko
bisāt-e-kahkashāñ ban kar shafaq kī surḳhiyāñ ho kar

charāġh-e-ārzū yuuñ jhilmilā kar bujh gayā āḳhir
dam-e-āḳhir kisī kī yaad aa.ī hichkiyāñ ho kar

ḳhusūsiyyat kā 'tālib' huuñ adāvat ho mohabbat ho
mujhī ko bas satā.e jā.iye nā-mehrbāñ ho kar

mohabbat aag ban jati hai sina mein nihan ho kar
tamannaen jala deti hain dil chingariyan ho kar

idhar bhi tum udhar bhi tum yahan bhi tum wahan bhi tum
ye tum ne kya qayamat ki nigahon se nihan ho kar

samajhte hain jise manzil fareb-e-rah-e-manzil hai
magar chup hun ye majburi sharik-e-karwan ho kar

unhen bhi dastan-e-hijr chupke se suna hi di
sukun-e-sham-e-gham ban kar sitaron ki zaban ho kar

sahar honi se pahle hi gulabi ho gae aansu
shafaq phuli hamari dastan-e-KHun-chakan ho kar

unhen nind aa rahi hai ya meri taqdir soti hai
thapakte hain kisi nale shab-e-gham loriyan ho kar

nuqush-e-arzu miT miT ke ubhre KHun hone ko
bisat-e-kahkashan ban kar shafaq ki surKHiyan ho kar

charagh-e-arzu yun jhilmila kar bujh gaya aaKHir
dam-e-aKHir kisi ki yaad aai hichkiyan ho kar

KHususiyyat ka 'talib' hun adawat ho mohabbat ho
mujhi ko bas satae jaiye na-mehrban ho kar


Source: Book : Shakh-e-nabat (Pg. 109) Author : Talib Baghpati Publication : Munshi har pashad Press Bulandshahar (1354) Edition : 1354

Leave a comment

+