tamām-duniyā kā laḳht-e-jigar banā huā thā
vo aadmī jo mirā dard-e-sar banā huā thā

use talāsh rahī haiñ mirī udaas āñkheñ
jo ḳhvāb raat ke pichhle pahar banā huā thā

pahuñch ke kūcha-e-jānāñ meñ aa gayā bāhar
mire vajūd ke andar jo Dar banā huā thā

kamāl-e-ishq ne mere kiyā hai zer use
kisī kā husn jo kal tak zabar banā huā thā

utartī kaise sukūñ kī vahāñ koī chiḌiyā
mahal jo hirs kī buniyād par banā huā thā

banā diyā use insān terī qurbat ne
tire firāq meñ jo jānvar banā huā thā

ye us kā shauq nahīñ us kī inkisārī thī
vasī.a ho ke bhī jo muḳhtasar banā huā thā

pahuñch gayā hai javānī se ab buḌhāpe tak
vo ek dukh jo sharīk-e-safar banā huā thā

havas ke chaak kī miTTī javān thī jab tak
tamām-shahr yahāñ kūza-gar banā huā thā

vo jāntā thā mire an-kahe dukhoñ kā ilaaj
magar vo 'faiz'-miyāñ be-ḳhabar banā huā thā

tamam-duniya ka laKHt-e-jigar bana hua tha
wo aadmi jo mera dard-e-sar bana hua tha

use talash rahi hain meri udas aankhen
jo KHwab raat ke pichhle pahar bana hua tha

pahunch ke kucha-e-jaanan mein aa gaya bahar
mere wajud ke andar jo Dar bana hua tha

kamal-e-ishq ne mere kiya hai zer use
kisi ka husn jo kal tak zabar bana hua tha

utarti kaise sukun ki wahan koi chiDiya
mahal jo hirs ki buniyaad par bana hua tha

bana diya use insan teri qurbat ne
tere firaq mein jo jaanwar bana hua tha

ye us ka shauq nahin us ki inkisari thi
wasia ho ke bhi jo muKHtasar bana hua tha

pahunch gaya hai jawani se ab buDhape tak
wo ek dukh jo sharik-e-safar bana hua tha

hawas ke chaak ki miTTi jawan thi jab tak
tamam-shahr yahan kuza-gar bana hua tha

wo jaanta tha mere an-kahe dukhon ka ilaj
magar wo 'faiz'-miyan be-KHabar bana hua tha