dil meñ ab āvāz kahāñ hai
TuuT gayā to saaz kahāñ hai

aañkh meñ aañsū lab pe ḳhamoshī
dil kī baat ab raaz kahāñ hai

sarv-o-sanobar sab ko dekhā
un kā sā andāz kahāñ hai

dil ḳhvābīda ruuh fasurda
vo josh-e-āġhāz kahāñ hai

parda bhī jalva ban jaatā
aañkh tajallī-sāz kahāñ hai

but-ḳhāne kā azm hai 'māhir'
ka.abe kā dar baaz kahāñ hai

dil mein ab aawaz kahan hai
TuT gaya to saz kahan hai

aankh mein aansu lab pe KHamoshi
dil ki baat ab raaz kahan hai

sarw-o-sanobar sab ko dekha
un ka sa andaz kahan hai

dil KHwabida ruh fasurda
wo josh-e-aghaz kahan hai

parda bhi jalwa ban jata
aankh tajalli-saz kahan hai

but-KHane ka azm hai 'mahir'
kabe ka dar baz kahan hai

Source: Book : Noquush (Pg. B-341 E-357) Publication : Nuqoosh Press Lahore (May June 1954) Edition : May June 1954