Subscribe to our newsletter and get our newest updates

Gopaldas Neeraj

  • Ghazal


ab to mazhab koi aisa bhi chalaya jae


ab to maz.hab koī aisā bhī chalāyā jaa.e
jis meñ insān ko insān banāyā jaa.e

jis kī ḳhushbū se mahak jaa.e paḌosī kā bhī ghar
phuul is qism kā har samt khilāyā jaa.e

aag bahtī hai yahāñ gañgā meñ jhelam meñ bhī
koī batlā.e kahāñ jā ke nahāyā jaa.e

pyaar kā ḳhuun huā kyuuñ ye samajhne ke liye
har añdhere ko ujāle meñ bulāyā jaa.e

mere dukh-dard kā tujh par ho asar kuchh aisā
maiñ rahūñ bhūkā to tujh se bhī na khāyā jaa.e

jism do ho ke bhī dil ek hoñ apne aise
merā aañsū terī palkoñ se uThāyā jaa.e

giit anman hai ġhazal chup hai rubā.ī hai dukhī
aise māhaul meñ 'nīraj' ko bulāyā jaa.e

ab to mazhab koi aisa bhi chalaya jae
jis mein insan ko insan banaya jae

jis ki KHushbu se mahak jae paDosi ka bhi ghar
phul is qism ka har samt khilaya jae

aag bahti hai yahan ganga mein jhelam mein bhi
koi batlae kahan ja ke nahaya jae

pyar ka KHun hua kyun ye samajhne ke liye
har andhere ko ujale mein bulaya jae

mere dukh-dard ka tujh par ho asar kuchh aisa
main rahun bhuka to tujh se bhi na khaya jae

jism do ho ke bhi dil ek hon apne aise
mera aansu teri palkon se uThaya jae

git anman hai ghazal chup hai rubai hai dukhi
aise mahaul mein 'niraj' ko bulaya jae

Videos
This video is playing from YouTube Videos
This video is playing from YouTube Shubha Mudgal

Leave a comment

+