pahle dard-e-dil pe kahte the ki ye kyā ho gayā
ab ye kāvish hai ki kyuuñ bīmār achchhā ho gayā

dil bhī pahlū meñ kabhī ik chiiz thā yādash-ba-ḳhair
ab ḳhudā jaane kahāñ jaatā rahā kyā ho gayā

aa ga.e lo vo ayādat ke liye ḳhud aa ga.e
ho gayā bīmār dard-e-hijr achchhā ho gayā

ek motī sā chamaktā hai sar-e-mizhgān-e-nāz
auj par kyā merī qismat kā sitārā ho gayā

ho gayā sab mere shikvoñ kā javāb-e-lā-javāb
un kā sharmā kar ye kah denā tumheñ kyā ho gayā

kasrtat-e-dīdār se un kī nigāheñ jhuk ga.iiñ
aks mizhgāñ kā naqāb-e-rū-e-zebā ho gayā

sahte sahte jo na sahnā thā use bhī sah liyā
piite piite zer-e-ġham āḳhir gavārā ho gayā

aap hī pahle uThā dī rū-e-raushan se naqāb
aap hī phir pūchhte haiñ chāñd ko kyā ho gayā

raat bhīgī jā rahī hai sard aaheñ ho chalīñ
chhoḌ ye mad-hoshiyāñ 'tālib' saverā ho gayā

pahle dard-e-dil pe kahte the ki ye kya ho gaya
ab ye kawish hai ki kyun bimar achchha ho gaya

dil bhi pahlu mein kabhi ek chiz tha yaadash-ba-KHair
ab KHuda jaane kahan jata raha kya ho gaya

aa gae lo wo ayaadat ke liye KHud aa gae
ho gaya bimar dard-e-hijr achchha ho gaya

ek moti sa chamakta hai sar-e-mizhgan-e-naz
auj par kya meri qismat ka sitara ho gaya

ho gaya sab mere shikwon ka jawab-e-la-jawab
un ka sharma kar ye kah dena tumhein kya ho gaya

kasrtat-e-didar se un ki nigahen jhuk gain
aks mizhgan ka naqab-e-ru-e-zeba ho gaya

sahte sahte jo na sahna tha use bhi sah liya
pite pite zer-e-gham aaKHir gawara ho gaya

aap hi pahle uTha di ru-e-raushan se naqab
aap hi phir puchhte hain chand ko kya ho gaya

raat bhigi ja rahi hai sard aahen ho chalin
chhoD ye mad-hoshiyan 'talib' sawera ho gaya

Source: