Subscribe to our newsletter and get our newest updates

Abbas Rizvi

  • Ghazal


guzar gaya wo zamana wo zaKHm bhar bhi gae


guzar gayā vo zamāna vo zaḳhm bhar bhī ga.e
safar tamām huā aur ham-safar bhī ga.e

usī nazar ke liye be-qarār rahte the
usī nigāh kī be-tābiyoñ se Dar bhī ga.e

hamārī raah meñ saaya kahīñ nahīñ thā magar
kisī shajar ne pukārā to ham Thahar bhī ga.e

ye sail-e-ashk hai barbād kar ke chhoḌegā
ye ghar na pāoge dariyā agar utar bhī ga.e

sahar huī to ye uqda bhī tā.eroñ pe khulā
ki āshiyāñ hī nahīñ ab ke bāl-o-par bhī ga.e

bahut aziiz thī ye zindagī magar ham log
kabhī kabhī to kisī aarzū meñ mar bhī ga.e

shajar ke saath koī barg-e-zard bhī na rahā
havā chalī to bahāroñ ke nauhagar bhī ga.e

guzar gaya wo zamana wo zaKHm bhar bhi gae
safar tamam hua aur ham-safar bhi gae

usi nazar ke liye be-qarar rahte the
usi nigah ki be-tabiyon se Dar bhi gae

hamari rah mein saya kahin nahin tha magar
kisi shajar ne pukara to hum Thahar bhi gae

ye sail-e-ashk hai barbaad kar ke chhoDega
ye ghar na paoge dariya agar utar bhi gae

sahar hui to ye uqda bhi taeron pe khula
ki aashiyan hi nahin ab ke baal-o-par bhi gae

bahut aziz thi ye zindagi magar hum log
kabhi kabhi to kisi aarzu mein mar bhi gae

shajar ke sath koi barg-e-zard bhi na raha
hawa chali to bahaaron ke nauhagar bhi gae


Source: Book : Quarterly TASTEER Lahore (Pg. 187) Author : Naseer Ahmed Nasir Publication : Room No.-1,1st Floor, Awan Plaza, Shadman Market, Lahore (Issue No. 7,8 Oct 1998 To Mar.1999) Edition : Issue No. 7,8 Oct 1998 To Mar.1999

Leave a comment

+