lafz to milte nahīñ iz.hār-e-mahsūsāt ko
ab vo samjheñ yā na samjheñ mere dil kī baat ko

dar-haqīqat tuur par muusā ko sūjhī hī nahīñ
varna āñkheñ jazb kar letīñ tajalliyāt ko

merī aage se haTā lo yā to ye mub.ham kitāb
yā palaTne do mujhe aurāq-e-maujūdāt ko

haa.e mat pūchho marīz-e-ġham kī kaifīyāt-e-karb
niiñd kyā ġhaflat sī ho jaatī hī pichhlī raat ko

merī aahoñ meñ ba-qaul un ke agar tāqat nahīñ
charḳh se phir kyuuñ sitāre TūTte haiñ raat ko

pahle to dil meñ ḳhudā jaane kidhar se aa chhupe
phir sitam ye hai ubhārā mere mahsūsāt ko

tak rahā hai phir koī hasrat se sū-e-asmāñ
phir kahīñ jazba na aa jaa.e tajalliyāt ko

muñh añdhere jab jahāñ sotā hai mad-hoshī kī niiñd
maiñ sunā kartā huuñ sāz-e-rūh ke naġhmāt ko

chāñdnī ho yā añdherī mujh ko 'tālib' vāsta
maiñ to aafat hī samajhtā huuñ hamesha raat ko

lafz to milte nahin izhaar-e-mahsusat ko
ab wo samjhen ya na samjhen mere dil ki baat ko

dar-haqiqat tur par musa ko sujhi hi nahin
warna aankhen jazb kar letin tajalliyat ko

meri aage se haTa lo ya to ye mubham kitab
ya palaTne do mujhe auraq-e-maujudat ko

hae mat puchho mariz-e-gham ki kaifiyat-e-karb
nind kya ghaflat si ho jati hi pichhli raat ko

meri aahon mein ba-qaul un ke agar taqat nahin
charKH se phir kyun sitare TuTte hain raat ko

pahle to dil mein KHuda jaane kidhar se aa chhupe
phir sitam ye hai ubhaara mere mahsusat ko

tak raha hai phir koi hasrat se su-e-asman
phir kahin jazba na aa jae tajalliyat ko

munh andhere jab jahan sota hai mad-hoshi ki nind
main suna karta hun saz-e-ruh ke naghmat ko

chandni ho ya andheri mujh ko 'talib' wasta
main to aafat hi samajhta hun hamesha raat ko

Source: