jī bhī kuchh aisā jalāyā hai ki jī jāntā hai
aap ne itnā rulāyā hai ki jī jāntā hai

yaad ban kar tirī ma.asūm vafā ne zālim
dil pe vo naqsh biThāyā hai ki jī jāntā hai

shauq-e-gustāḳh ne aksar tumheñ barham kar ke
haa.e vo lutf uThāyā hai ki jī jāntā hai

jab kabhī yaad dilāyā hai taḳhayyul ne tumheñ
is tarah yaad dilāyā hai ki jī jāntā hai

itnā afsāna-e-furqat ko kiyā ishq ne zabt
sirf ye dars paḌhāyā hai ki jī jāntā hai

dars-e-ibrat hai mire dil kī tabāhī 'tālib'
ḳhaak meñ aisā milāyā hai ki jī jāntā hai

ji bhi kuchh aisa jalaya hai ki ji jaanta hai
aap ne itna rulaya hai ki ji jaanta hai

yaad ban kar teri masum wafa ne zalim
dil pe wo naqsh biThaya hai ki ji jaanta hai

shauq-e-gustaKH ne aksar tumhein barham kar ke
hae wo lutf uThaya hai ki ji jaanta hai

jab kabhi yaad dilaya hai taKHayyul ne tumhein
is tarah yaad dilaya hai ki ji jaanta hai

itna afsana-e-furqat ko kiya ishq ne zabt
sirf ye dars paDhaya hai ki ji jaanta hai

dars-e-ibrat hai mere dil ki tabahi 'talib'
KHak mein aisa milaya hai ki ji jaanta hai

Source: