kuchh sabab hī na bane baat baḌhā dene kā
khel khelā huā ye us ko bhulā dene kā

apne hī sāmne dīvār banā baiThā huuñ
hai ye anjām use raste se haTā dene kā

yūñhī chup chaap guzar jā.iye in galiyoñ se
yahāñ kuchh aur hī matlab hai sadā dene kā

rāsta roknā maqsad nahīñ kuchh aur hai ye
darmiyāñ meñ koī dīvār uThā dene kā

aane vāloñ ko tarīqa mujhe aatā hai bahut
jaane vāloñ ke ta.āqub meñ lagā dene kā

ek maqsad to huā DhūñDnā us ko har-sū
lutf hī aur hai paane se gañvā dene kā

ik hunar paas thā apne so nahīñ ab vo bhī
jo dikhā.ī nahīñ detā hai dikhā dene kā

sab ko mālūm hai aur hausla rakhtā huuñ abhī
apne likkhe hue ko ḳhud hī miTā dene kā

TuuT paḌtī hai qayāmat koī pahle hī 'zafar'
qasd kartā huuñ jo fitne ko jagā dene kā

kuchh sabab hi na bane baat baDha dene ka
khel khela hua ye us ko bhula dene ka

apne hi samne diwar bana baiTha hun
hai ye anjam use raste se haTa dene ka

yunhi chup chap guzar jaiye in galiyon se
yahan kuchh aur hi matlab hai sada dene ka

rasta rokna maqsad nahin kuchh aur hai ye
darmiyan mein koi diwar uTha dene ka

aane walon ko tariqa mujhe aata hai bahut
jaane walon ke taaqub mein laga dene ka

ek maqsad to hua DhunDna us ko har-su
lutf hi aur hai pane se ganwa dene ka

ek hunar pas tha apne so nahin ab wo bhi
jo dikhai nahin deta hai dikha dene ka

sab ko malum hai aur hausla rakhta hun abhi
apne likkhe hue ko KHud hi miTa dene ka

TuT paDti hai qayamat koi pahle hi 'zafar'
qasd karta hun jo fitne ko jaga dene ka