Subscribe to our newsletter and get our newest updates

Devesh Dixit

  • Ghazal


ye aankhen rah takti hain tumhein ye man bulata hai


ye āñkheñ raah taktī haiñ tumheñ ye man bulātā hai
chale aao tumheñ suunā mirā āñgan bulātā hai

barastī roz haiñ āñkheñ ye bārish hī nahīñ ruktī
tumheñ bhīge hue ashkoñ kā ye dāman bulātā hai

jahāñ peñgeñ baḌhāte the shajar vo yaad karte haiñ
vo jhūle pūchhte haiñ ab tumheñ sāvan bulātā hai

gulistāñ jab se ujḌā hai bahāreñ bhī nahīñ lauTīñ
fazā āvāz detī hai tumheñ upvan bulātā hai

dar-o-dīvār aur rāheñ sabhī sadme meñ rahte haiñ
sañvarte the jahāñ pahle vahī darpan bulātā hai

chale aao ki ab tanhā.iyāñ jiine nahīñ detīñ
tumheñ ujḌe hue dil kā ye sūnā-pan bulātā hai

ye aankhen rah takti hain tumhein ye man bulata hai
chale aao tumhein suna mera aangan bulata hai

barasti roz hain aankhen ye barish hi nahin rukti
tumhein bhige hue ashkon ka ye daman bulata hai

jahan pengen baDhate the shajar wo yaad karte hain
wo jhule puchhte hain ab tumhein sawan bulata hai

gulistan jab se ujDa hai bahaaren bhi nahin lauTin
faza aawaz deti hai tumhein upwan bulata hai

dar-o-diwar aur rahen sabhi sadme mein rahte hain
sanwarte the jahan pahle wahi darpan bulata hai

chale aao ki ab tanhaiyan jine nahin detin
tumhein ujDe hue dil ka ye suna-pan bulata hai


Leave a comment

+