Subscribe to our newsletter and get our newest updates

Mahmood Shaam

  • Ghazal


bas ek apne hi qadmon ki chap sunta hun


bas ek apne hī qadmoñ kī chaap suntā huuñ
maiñ kaun huuñ ki bhare shahr meñ bhī tanhā huuñ

jahāñ maiñ jism thā tū ne vahāñ to saath diyā
vahāñ bhī aa ki jahāñ maiñ tamām saayā huuñ

vo ek moḌ bhī is rah pe aa.egā ki jahāñ
milā ke haath tū bolegā maiñ to chaltā huuñ

tirī judā.ī kā ġham hai na tere milne kā
maiñ apnī aag meñ din raat jaltā rahtā huuñ

ga.e vo roz ki tū bā.is-e-qarār thī jab
tirī jhalak se bhī ab to udaas hotā huuñ

mire baġhair hai mumkin kahāñ tirī takmīl
mujhe pukār ki maiñ hī tirā kinārā huuñ

kabhī to Duub sahī shaam ke samundar meñ
ki maiñ sadā hī javāhar nikāl laayā huuñ

bas ek apne hi qadmon ki chap sunta hun
main kaun hun ki bhare shahr mein bhi tanha hun

jahan main jism tha tu ne wahan to sath diya
wahan bhi aa ki jahan main tamam saya hun

wo ek moD bhi is rah pe aaega ki jahan
mila ke hath tu bolega main to chalta hun

teri judai ka gham hai na tere milne ka
main apni aag mein din raat jalta rahta hun

gae wo roz ki tu bais-e-qarar thi jab
teri jhalak se bhi ab to udas hota hun

mere baghair hai mumkin kahan teri takmil
mujhe pukar ki main hi tera kinara hun

kabhi to Dub sahi sham ke samundar mein
ki main sada hi jawahar nikal laya hun


Source: Book : chera chera mery kahani (Pg. 63)

Leave a comment

+