shab ke tārīk samundar se guzar aayā huuñ
TuuTā taara huuñ ḳhalāoñ se utar aayā huuñ

tujh se jo ho na sakā kaam vo kar aayā huuñ
āsmāñ chhoḌ ke dhartī pe utar aayā huuñ

dasht-e-tanhā.ī meñ bikhrā huuñ havāoñ kī tarah
ik sadā ban ke dil-e-sañg meñ dar aayā huuñ

jaane kis ḳhauf se phirtā huuñ maiñ ghabrāyā huā
kyā balā ban ke maiñ ḳhud apne hī sar aayā huuñ

dil-shikasta se dar-o-bām kī muddat ke ba.ad
ḳhairiyat pūchhne ujḌe hue ghar aayā huuñ

shoḳh rātoñ ke liye mere ta.āqub meñ na aa
dard kā chāñd huuñ ḳhvāboñ meñ nazar aayā huuñ

apnā saaya bhī 'zafar' mujh ko na pahchān sakā
kis na.e bhes meñ maiñ aaj idhar aayā huuñ

shab ke tarik samundar se guzar aaya hun
TuTa tara hun KHalaon se utar aaya hun

tujh se jo ho na saka kaam wo kar aaya hun
aasman chhoD ke dharti pe utar aaya hun

dasht-e-tanhai mein bikhra hun hawaon ki tarah
ek sada ban ke dil-e-sang mein dar aaya hun

jaane kis KHauf se phirta hun main ghabraya hua
kya bala ban ke main KHud apne hi sar aaya hun

dil-shikasta se dar-o-baam ki muddat ke baad
KHairiyat puchhne ujDe hue ghar aaya hun

shoKH raaton ke liye mere taaqub mein na aa
dard ka chand hun KHwabon mein nazar aaya hun

apna saya bhi 'zafar' mujh ko na pahchan saka
kis nae bhes mein main aaj idhar aaya hun

Source: Shab Khoon(Shumara Number-062)