dikhā.ī dene ke aur dikhā.ī na dene ke darmiyān sā kuchh
ḳhayāl kī lā-makāniyoñ meñ ubhar rahā hai makān sā kuchh

koī ta.ayyun koī tayaqqun nazar ko mahdūd rakh sake jo
falak se nīche bahut hī nīche banā hai ik sā.ebān sā kuchh

numū kā tūfāñ thā āfrīnash kī zad pe ham tum khaḌe the donoñ
tumheñ bhī kuchh yaad aa.e shāyad mujhe to aatā hai dhyān sā kuchh

havā.eñ vābastagī se pur haiñ fazā pe maujūdgī hai taarī
navāh-e-jāñ meñ lahak rahā hai base-basā.e jahān sā kuchh

kahīñ ye manzar meñ qaid lamhe kahīñ ye lamhoñ meñ qaid manzar
rasā.ī kī āzmā.ishoñ meñ rihā.ī kā imtihān sā kuchh

andhere kāġhaz kī vus.atoñ meñ kahīñ kahīñ raushnī ke dhabbe
ye sa.ī-e-tajsīm-e-nā-bayānī ye ishtibāh-e-bayān sā kuchh

dikhai dene ke aur dikhai na dene ke darmiyan sa kuchh
KHayal ki la-makaniyon mein ubhar raha hai makan sa kuchh

koi tayyun koi tayaqqun nazar ko mahdud rakh sake jo
falak se niche bahut hi niche bana hai ek saeban sa kuchh

numu ka tufan tha aafrinash ki zad pe hum tum khaDe the donon
tumhein bhi kuchh yaad aae shayad mujhe to aata hai dhyan sa kuchh

hawaen wabastagi se pur hain faza pe maujudgi hai tari
nawah-e-jaan mein lahak raha hai base-basae jahan sa kuchh

kahin ye manzar mein qaid lamhe kahin ye lamhon mein qaid manzar
rasai ki aazmaishon mein rihai ka imtihan sa kuchh

andhere kaghaz ki wusaton mein kahin kahin raushni ke dhabbe
ye sai-e-tajsim-e-na-bayani ye ishtibah-e-bayan sa kuchh

Source: Book : sargoshiyan zamanon ki (Pg. 136)