ik parinda sar-e-dīvār bhī baaqī na rahā
ab to parvāz kā dīdār bhī baaqī na rahā

habs aisā thā ki saa.e meñ sulag uTThe gulāb
lū chalī aisī ki gulzār bhī baaqī na rahā

log dam saadh ga.e ḳhauf ne gherā aise
koī andesha-e-be-kār bhī baaqī na rahā

hādisa kyā huā bikhre hue sannāTe meñ
lafz se rishta-e-iz.hār bhī baaqī na rahā

ek vahshat hī matā.a-e-ġham-e-jānāñ niklī
lutf-e-dildārī-e-ġham-ḳhvār bhī baaqī na rahā

jaañ sisaktī rahī ḳhvāhish ke bayābānoñ meñ
shauq-e-har-lahza kā āzār bhī baaqī na rahā

dil bhī yādoñ kī kaḌī dhuup meñ kumhlā sā gayā
aur koī sāya-e-dīvār bhī baaqī na rahā

aisī vīrānī hai ḳhud maut bhī katrā ke chalī
koī marne kā sazā-vār bhī baaqī na rahā

ek parinda sar-e-diwar bhi baqi na raha
ab to parwaz ka didar bhi baqi na raha

habs aisa tha ki sae mein sulag uTThe gulab
lu chali aisi ki gulzar bhi baqi na raha

log dam sadh gae KHauf ne ghera aise
koi andesha-e-be-kar bhi baqi na raha

hadisa kya hua bikhre hue sannaTe mein
lafz se rishta-e-izhaar bhi baqi na raha

ek wahshat hi mataa-e-gham-e-jaanan nikli
lutf-e-dildari-e-gham-KHwar bhi baqi na raha

jaan sisakti rahi KHwahish ke bayabanon mein
shauq-e-har-lahza ka aazar bhi baqi na raha

dil bhi yaadon ki kaDi dhup mein kumhla sa gaya
aur koi saya-e-diwar bhi baqi na raha

aisi virani hai KHud maut bhi katra ke chali
koi marne ka saza-war bhi baqi na raha

Source: Book : Shakh-e-gazal (Pg. 43) Author : Mah-e-talat Zahidi Publication : Baikan Books Gulgisht Multan, Kitab nagar Hassan (2004) Edition : 2004