ḳhamosh baiThe ho kyuuñ sāz-e-be-sadā kī tarah
koī payām to do ramz-āshnā kī tarah

kahīñ tumhārī ravish ḳhār-o-gul pe baar na ho
riyāz-e-dahr se guzre chalo sabā kī tarah

niyāz-o-ijz hī me.arāj-e-ādamiyyat haiñ
baḌhāo dast-e-saḳhāvat bhī iltijā kī tarah

jo chāhte ho badalnā mizāj-e-tūfāñ ko
to nāḳhudā pe bharosā karo ḳhudā kī tarah

mujhe hamesha rah-e-zīst ke dorāhoñ par
ik ajnabī hai jo miltā hai āshnā kī tarah

tamām umr rahā sābiqa yazīdoñ se
mire liye to ye duniyā hai karbalā kī tarah

umiid un se vafā kī to ḳhair kyā kiije
jafā bhī karte nahīñ vo kabhī jafā kī tarah

ye dahr bhī to hai mai-ḳhāna-e-alast-numā
raho yahāñ bhī kisī riñd-e-pārsā kī tarah

zabāñ pe shikva-e-be-mehrī-e-ḳhudā kyuuñ hai?
duā to māñgiye 'ātish' kabhī duā kī tarah

KHamosh baiThe ho kyun saz-e-be-sada ki tarah
koi payam to do ramz-ashna ki tarah

kahin tumhaari rawish KHar-o-gul pe bar na ho
riyaz-e-dahr se guzre chalo saba ki tarah

niyaz-o-ijz hi mearaj-e-adamiyyat hain
baDhao dast-e-saKHawat bhi iltija ki tarah

jo chahte ho badalna mizaj-e-tufan ko
to naKHuda pe bharosa karo KHuda ki tarah

mujhe hamesha rah-e-zist ke dorahon par
ek ajnabi hai jo milta hai aashna ki tarah

tamam umr raha sabiqa yazidon se
mere liye to ye duniya hai karbala ki tarah

umid un se wafa ki to KHair kya kije
jafa bhi karte nahin wo kabhi jafa ki tarah

ye dahr bhi to hai mai-KHana-e-alast-numa
raho yahan bhi kisi rind-e-parsa ki tarah

zaban pe shikwa-e-be-mehri-e-KHuda kyun hai?
dua to mangiye 'atish' kabhi dua ki tarah

Source: Book : Jada-e-manzil (Pg. 11) Author : Atish Bahawalpuri Publication : Nirali Duniya Publications (2001) Edition : 2001