jab raushnī chamkī to uThāyā sar-e-sāhil
miTTī ke pyāle meñ thā sonā sar-e-sāhil

paanī pe makāñ jaise makīñ aur kahīñ ġham
kuchh aise nazar aa.ī thī duniyā sar-e-sāhil

jab tai ho mulāqāt us āshufta-sarī se
tum aur hī kuchh rañg pahannā sar-e-sāhil

kashtī meñ nazar aa.ī thī jannat kī tajallī
patvār uThāte hī maiñ bhāgā sar sāhil

ab qaum utāre koī siine pe hamāre
pahle to utārā thā sahīfa sar-e-sāhil

maiñ haath baḌhātā to bhalā kaise baḌhātā
tasvīr meñ the sāġhar-o-mīnā sar-e-sāhil

ham log karachi ke ajab log haiñ sāhab
khānā hai samundar meñ to piinā sar-e-sāhil

jab raushni chamki to uThaya sar-e-sahil
miTTi ke pyale mein tha sona sar-e-sahil

pani pe makan jaise makin aur kahin gham
kuchh aise nazar aai thi duniya sar-e-sahil

jab tai ho mulaqat us aashufta-sari se
tum aur hi kuchh rang pahanna sar-e-sahil

kashti mein nazar aai thi jannat ki tajalli
patwar uThate hi main bhaga sar sahil

ab qaum utare koi sine pe hamare
pahle to utara tha sahifa sar-e-sahil

main hath baDhata to bhala kaise baDhata
taswir mein the saghar-o-mina sar-e-sahil

hum log karachi ke ajab log hain sahab
khana hai samundar mein to pina sar-e-sahil