shauq jab bhī bandagī kā rahnumā hotā nahīñ
zindagī se zindagī kā haq adā hotā nahīñ

kyā samajh ā.eñgī tum ko ishq kī bārīkiyāñ
dil tumhārā jab talak dard-āshnā hotā nahīñ

ruuh o tan kā ishq ye qaa.em rahegā dā.imī
ḳhatm ba.ad-e-marg bhī ye silsila hotā nahīñ

kaun hai jo jurm karne ko hai shab kā muntazir
raushnī meñ din kī yaaro kyā bhalā hotā nahīñ

ġhāliban hotā mujhe bhī ghar ke girne kā gila
rāhgīroñ kā agar ye rāsta hotā nahīñ

bad-gumānī kī fazā meñ kyā safā.ī deñ tumheñ
is fazā meñ koī bhī hal mas.ala hotā nahīñ

ik zarā sī baat pe ye muñh banānā rūThnā
is tarah to koī apnoñ se ḳhafā hotā nahīñ

koī gustāḳhī to kī hai naav ne girdāb se
varna yuuñ sāhil pe koī ġham-zada hotā nahīñ

kamra-e-taqdīr meñ aatī urūs-e-ārzū
vaqt-e-nā-hanjār kā jo faisla hotā nahīñ

aañkh se piine kā bhī saaqī ne māñgā hai hisāb
is ravish se yaaro koī mai-kada hotā nahīñ

'muftī' dekho mahr palTā hai mirī taqdīr kā
dekhte haiñ kis tarah sajda adā hotā nahīñ

shauq jab bhi bandagi ka rahnuma hota nahin
zindagi se zindagi ka haq ada hota nahin

kya samajh aaengi tum ko ishq ki barikiyan
dil tumhaara jab talak dard-ashna hota nahin

ruh o tan ka ishq ye qaem rahega daimi
KHatm baad-e-marg bhi ye silsila hota nahin

kaun hai jo jurm karne ko hai shab ka muntazir
raushni mein din ki yaro kya bhala hota nahin

ghaaliban hota mujhe bhi ghar ke girne ka gila
rahgiron ka agar ye rasta hota nahin

bad-gumani ki faza mein kya safai den tumhein
is faza mein koi bhi hal masala hota nahin

ek zara si baat pe ye munh banana ruThna
is tarah to koi apnon se KHafa hota nahin

koi gustaKHi to ki hai naw ne girdab se
warna yun sahil pe koi gham-zada hota nahin

kamra-e-taqdir mein aati urus-e-arzu
waqt-e-na-hanjar ka jo faisla hota nahin

aankh se pine ka bhi saqi ne manga hai hisab
is rawish se yaro koi mai-kada hota nahin

'mufti' dekho mahr palTa hai meri taqdir ka
dekhte hain kis tarah sajda ada hota nahin