Subscribe to our newsletter and get our newest updates

Baqi Siddiqui

  • Ghazal


rang-e-dil rang-e-nazar yaad aaya


rañg-e-dil rañg-e-nazar yaad aayā
tere jalvoñ kā asar yaad aayā

vo nazar ban ga.ī paiġhām-e-hayāt
halqa-e-shām-o-sahar yaad aayā

ye zamāna ye dil-e-dīvāna
rishta-e-sañg-o-guhar yaad aayā

ye nayā shahr ye raushan rāheñ
apnā andāz-e-safar yaad aayā

raah kā ruup banī dhuup apnī
koī saaya na shajar yaad aayā

kab na us shahr meñ patthar barse
kab na us shahr meñ sar yaad aayā

ghar meñ thā dasht-navardī kā ḳhayāl
dasht meñ aa.e to ghar yaad aayā

gard uḌtī hai sar-e-rāh-e-ḳhayāl
dil-e-nādāñ kā safar yaad aayā

ek hañstī huī badlī dekhī
ek jaltā huā ghar yaad aayā

is tarah shaam ke saa.e phaile
raat kā pichhlā pahar yaad aayā

phir chale ghar se tamāshā ban kar
phir tirā rauzan-e-dar yaad aayā

kisī patthar kī haqīqat hī kyā
dil kā ā.īna magar yaad aayā

aañch dāmān-e-sabā se aa.ī
e.atibār-e-gul-e-tar yaad aayā

dil jalā dhuup meñ aisā ab ke
paañv yaad aa.e na sar yaad aayā

gar paḌe haath se kāġhaz 'bāqī'
apnī mehnat kā samar yaad aayā

rang-e-dil rang-e-nazar yaad aaya
tere jalwon ka asar yaad aaya

wo nazar ban gai paigham-e-hayat
halqa-e-sham-o-sahar yaad aaya

ye zamana ye dil-e-diwana
rishta-e-sang-o-guhar yaad aaya

ye naya shahr ye raushan rahen
apna andaz-e-safar yaad aaya

rah ka rup bani dhup apni
koi saya na shajar yaad aaya

kab na us shahr mein patthar barse
kab na us shahr mein sar yaad aaya

ghar mein tha dasht-nawardi ka KHayal
dasht mein aae to ghar yaad aaya

gard uDti hai sar-e-rah-e-KHayal
dil-e-nadan ka safar yaad aaya

ek hansti hui badli dekhi
ek jalta hua ghar yaad aaya

is tarah sham ke sae phaile
raat ka pichhla pahar yaad aaya

phir chale ghar se tamasha ban kar
phir tera rauzan-e-dar yaad aaya

kisi patthar ki haqiqat hi kya
dil ka aaina magar yaad aaya

aanch daman-e-saba se aai
eatibar-e-gul-e-tar yaad aaya

dil jala dhup mein aisa ab ke
panw yaad aae na sar yaad aaya

gar paDe hath se kaghaz 'baqi'
apni mehnat ka samar yaad aaya


Source: Book : Bar-e-Safar (Pg. 84) Author : Baqi Siddiqui Publication : Maktaba Urdu Daijest, Lahore (1969) Edition : 1969

Leave a comment

+