Subscribe to our newsletter and get our newest updates

Mahir Abdul Hayee

  • Ghazal


kis ke aangan se guzar kar ye hawa aati hai


kis ke āñgan se guzar kar ye havā aatī hai
siskiyāñ letī huī bū-e-hinā aatī hai

kyā kamī hai ki nigāhoñ se gire jaate ho
dil meñ ghar karne kī tum ko to adā aatī hai

dil kī bāteñ mujhe kahnī nahīñ ātīñ lekin
yahī kyā kam hai tirī hamd-o-sanā aatī hai

khā rahī hai tan-e-bīmār ko andar andar
kis masīhā kī dukāñ se ye davā aatī hai

kis jagah ruk ke zarā der ko dam le koī
kahīñ saaya hai shajar kā na sar aatī hai

ab bahar-gām baḌhī jaatī hai taklīf-e-safar
ab musāfir ko bahut yād-e-ḳhudā aatī hai

muddatoñ sañg musībat kī ragaḌ khātā hai
tab kahīñ ā.īna-e-dil meñ jilā aatī hai

ek hammām meñ goyā ki sabhī nañge haiñ
sharm aatī hai na duniyā ko hayā aatī hai

ab to is kār-r-gah-e-shīsha-garī meñ 'māhir'
har-nafas taaza chhanāke kī sadā aatī hai

kis ke aangan se guzar kar ye hawa aati hai
siskiyan leti hui bu-e-hina aati hai

kya kami hai ki nigahon se gire jate ho
dil mein ghar karne ki tum ko to ada aati hai

dil ki baaten mujhe kahni nahin aatin lekin
yahi kya kam hai teri hamd-o-sana aati hai

kha rahi hai tan-e-bimar ko andar andar
kis masiha ki dukan se ye dawa aati hai

kis jagah ruk ke zara der ko dam le koi
kahin saya hai shajar ka na sar aati hai

ab bahar-gam baDhi jati hai taklif-e-safar
ab musafir ko bahut yaad-e-KHuda aati hai

muddaton sang musibat ki ragaD khata hai
tab kahin aaina-e-dil mein jila aati hai

ek hammam mein goya ki sabhi nange hain
sharm aati hai na duniya ko haya aati hai

ab to is kar-r-gah-e-shisha-gari mein 'mahir'
har-nafas taza chhanake ki sada aati hai


Source: Book : Hari Sonahri Khak (Ghazal) (Pg. 61) Author : Mahir Abdul Hayee Publication : Bazme-e-Urdu,Mau (2008) Edition : 2008

Leave a comment

+