kaun hai kis kā giraftār na samjhā jaa.e
yahī behtar hai ye asrār na samjhā jaa.e

maiñ ne kab duniyā meñ aane kī tamannā kī thī
mujh ko duniyā kā talabgār na samjhā jaa.e

saarī duniyā ko badalnā koī āsān nahīñ
kisī dīvāne ko be-kār na samjhā jaa.e

us ko bātin se sarokār hai zāhir se nahīñ
diin ko raunaq-e-bāzār na samjhā jaa.e

ik yahī baat to hai is meñ samajhne vaalī
mujhe kāfir use dīñ-dār na samjhā jaa.e

terī duniyā meñ tire husn kā shaidā.ī huuñ
ai ḳhudā mujh ko gunahgār na samjhā jaa.e

nau-e-insāñ kī baḌā.ī kā taqāzā hai yahī
rañg aur nasl ko me.aar na samjhā jaa.e

kaun hai kis ka giraftar na samjha jae
yahi behtar hai ye asrar na samjha jae

main ne kab duniya mein aane ki tamanna ki thi
mujh ko duniya ka talabgar na samjha jae

sari duniya ko badalna koi aasan nahin
kisi diwane ko be-kar na samjha jae

us ko baatin se sarokar hai zahir se nahin
din ko raunaq-e-bazar na samjha jae

ek yahi baat to hai is mein samajhne wali
mujhe kafir use din-dar na samjha jae

teri duniya mein tere husn ka shaidai hun
ai KHuda mujh ko gunahgar na samjha jae

nau-e-insan ki baDai ka taqaza hai yahi
rang aur nasl ko mear na samjha jae