hāsil kisī se naqd-e-himāyat na kar sakā
maiñ apnī saltanat pe hukūmat na kar sakā

har rañg meñ raqīb-e-zar-e-nām-o-nañg huuñ
maiñ vo huuñ jo kisī se mohabbat na kar sakā

ghultā rahā hai merī ragoñ meñ bhī koī zahr
lekin maiñ is dayār se hijrat na kar sakā

paḌtā nahīñ kisī ke bichhaḌne se koī farq
maiñ us ko sach batāne kī zahmat na kar sakā

aayā jo us kā zikr to maiñ guñg rah gayā
aur aa.ine se us kī shikāyat na kar sakā

baaqī rakhī hai mere lahū ne matā-e-hosh
maiñ ne vafā to kī thī nihāyat na kar sakā

ab bhī shagufta nuur se hai us ko rabt-e-ḳhās
vo jo mire charāġh kī izzat na kar sakā

har-chand us gulāb pe tashbīb khul ga.ī
is par bhī maiñ gurez kī himmat na kar sakā

'sājid' qafas kī tīliyoñ ko toḌ kar bhī maiñ
is dasht-e-be-kanār meñ vahshat na kar sakā

hasil kisi se naqd-e-himayat na kar saka
main apni saltanat pe hukumat na kar saka

har rang mein raqib-e-zar-e-nam-o-nang hun
main wo hun jo kisi se mohabbat na kar saka

ghulta raha hai meri ragon mein bhi koi zahr
lekin main is dayar se hijrat na kar saka

paDta nahin kisi ke bichhaDne se koi farq
main us ko sach batane ki zahmat na kar saka

aaya jo us ka zikr to main gung rah gaya
aur aaine se us ki shikayat na kar saka

baqi rakhi hai mere lahu ne mata-e-hosh
main ne wafa to ki thi nihayat na kar saka

ab bhi shagufta nur se hai us ko rabt-e-KHas
wo jo mere charagh ki izzat na kar saka

har-chand us gulab pe tashbib khul gai
is par bhi main gurez ki himmat na kar saka

'sajid' qafas ki tiliyon ko toD kar bhi main
is dasht-e-be-kanar mein wahshat na kar saka