havādisāt ke maare sa.ūbatoñ meñ pale
nigāh-e-garm se tarsāñ hoñ bijliyoñ ke jale

vo but-kada thā jahāñ sar jhuke charāġh jale
ye mai-kada hai yahāñ ḳham uThe sharāb chale

ye raqs-e-anjum-o-mahtāb ye samāñ ye sukūñ
ye daur-e-mai abhī kuchh aur thoḌī der chale

jo apne aap hī meñ karda-rāh-e-manzil the
rah-e-hayāt meñ kuchh aise rahnumā bhī mile

bisāt-e-anjum-o-mah ho ki mai-kade kā ḳharosh
ye bazm rañg pe aatī hai apnī raat Dhale

ziyā vo dī hai mire dāġh-hā-e-dil ne ki bas
charāġh-e-bazm-e-tamannā na ek raat jale

jo apnī qaum kī kashtī ki ḳhud Dubo Daale
ham aise rāhbar-e-qaum ke baġhair bhale

isī tazād meñ muzmar hai zindagī kā fusūñ
kahīñ charāġh bujhe aur kahīñ charāġh jale

ḳhudā bachā.e bas us mīr-e-kārvāñ se 'jalīl'
jo kaaT letā ho ḳhud ahl-e-kārvāñ ke gale

hawadisat ke mare saubaton mein pale
nigah-e-garm se tarsan hon bijliyon ke jale

wo but-kada tha jahan sar jhuke charagh jale
ye mai-kada hai yahan KHam uThe sharab chale

ye raqs-e-anjum-o-mahtab ye saman ye sukun
ye daur-e-mai abhi kuchh aur thoDi der chale

jo apne aap hi mein karda-rah-e-manzil the
rah-e-hayat mein kuchh aise rahnuma bhi mile

bisat-e-anjum-o-mah ho ki mai-kade ka KHarosh
ye bazm rang pe aati hai apni raat Dhale

ziya wo di hai mere dagh-ha-e-dil ne ki bas
charagh-e-bazm-e-tamanna na ek raat jale

jo apni qaum ki kashti ki KHud Dubo Dale
hum aise rahbar-e-qaum ke baghair bhale

isi tazad mein muzmar hai zindagi ka fusun
kahin charagh bujhe aur kahin charagh jale

KHuda bachae bas us mir-e-karwan se 'jalil'
jo kaT leta ho KHud ahl-e-karwan ke gale

Source: Haft Rang(Bijnor Ke Muqami Shora ka Intikhab-e-kalam)