Subscribe to our newsletter and get our newest updates

Yasmin Husaini Zaidi Nikhat

  • Ghazal


behaal dil ka haal karun to ghazal kahun


behāl dil kā haal karūñ to ġhazal kahūñ
jiine kā phir malāl karūñ to ġhazal kahūñ

dil to misāl-e-sañg hai TūTegā kyā bhalā
ḳhasta-jigar kā haal karūñ to ġhazal kahūñ

ye rañg chaar roza hai ra.anā.ī chaar roz
jo husn lā-zavāl karūñ to ġhazal kahūñ

hai lutf is miyāna-ravī meñ bhalā kahāñ
kuchh amr bā-kamāl karūñ to ġhazal kahūñ

mausam na sard garm na tūfāñ kā zor hai
ab ḳhud hī kuchh vabāl karūñ to ġhazal kahūñ

muddat huī habīb se shikva kiye hue
ab us se kuchh savāl karūñ to ġhazal kahūñ

haiñ is jahāñ meñ achchhe suḳhnavar hazār-hā
'nik.hat' ko be-misāl karūñ to ġhazal kahūñ

behaal dil ka haal karun to ghazal kahun
jine ka phir malal karun to ghazal kahun

dil to misal-e-sang hai TuTega kya bhala
KHasta-jigar ka haal karun to ghazal kahun

ye rang chaar roza hai ranai chaar roz
jo husn la-zawal karun to ghazal kahun

hai lutf is miyana-rawi mein bhala kahan
kuchh amr ba-kamal karun to ghazal kahun

mausam na sard garm na tufan ka zor hai
ab KHud hi kuchh wabaal karun to ghazal kahun

muddat hui habib se shikwa kiye hue
ab us se kuchh sawal karun to ghazal kahun

hain is jahan mein achchhe suKHnawar hazar-ha
'nikhat' ko be-misal karun to ghazal kahun


Leave a comment

+