Subscribe to our newsletter and get our newest updates

Hakeem Manzoor

  • Ghazal


Dhal gaya jism mein aaine mein patthar mein kabhi


Dhal gayā jism meñ ā.īne meñ patthar meñ kabhī
chhup sakā maiñ na kisī rañg ke paikar meñ kabhī

maiñ yahī nuqta-e-mauhūm rahūñgā na sadā
maiñ jhalak uTThūñgā āḳhir kisī manzar meñ kabhī

vo samundar kī baḌā.ī se hai mar.ūb ki vo
tishna-lab ban ke rahā hai na samundar meñ kabhī

tujh pe khul jā.eñge ḳhud apne bhī asrār ka.ī
tū zarā mujh ko bhī rakh apne barābar meñ kabhī

dekhte haiñ dar-o-dīvār harīfāna mujhe
itnā be-bas bhī kahāñ hogā koī ghar meñ kabhī

asl meñ kuchh bhī na thā chand lakīroñ ke sivā
ham bhī rakhte the yaqīñ harf-e-muqaddar meñ kabhī

us se kyā pūchhte ham apne ma.ānī 'manzūr'
phuul khilte nahīñ dekhe kisī banjar meñ kabhī

Dhal gaya jism mein aaine mein patthar mein kabhi
chhup saka main na kisi rang ke paikar mein kabhi

main yahi nuqta-e-mauhum rahunga na sada
main jhalak uTThunga aaKHir kisi manzar mein kabhi

wo samundar ki baDai se hai marub ki wo
tishna-lab ban ke raha hai na samundar mein kabhi

tujh pe khul jaenge KHud apne bhi asrar kai
tu zara mujh ko bhi rakh apne barabar mein kabhi

dekhte hain dar-o-diwar harifana mujhe
itna be-bas bhi kahan hoga koi ghar mein kabhi

asl mein kuchh bhi na tha chand lakiron ke siwa
hum bhi rakhte the yaqin harf-e-muqaddar mein kabhi

us se kya puchhte hum apne maani 'manzur'
phul khilte nahin dekhe kisi banjar mein kabhi


Source: Book : Natamam (Pg. 49) Author : Hakeem Manzoor Publication : Samt Publication 2/48 Rajendar Nagar New Delhi-110060 (1977) Edition : 1977

Leave a comment

+