jis qadar qalb kī taskīn ke sāmāñ hoñge
karb afzā-e-sukūn-e-ġham-e-hijrāñ hoñge

arsa-e-hashr meñ jo ishq kā unvāñ hoñge
merī hī ḳhaak ke ajzā-e-pareshāñ hoñge

ashk ma.asūm jo ḳhamyāza-e-isyāñ hoñge
vo bhī munjumla-e-saramāyā-e-īmāñ hoñge

mere armāñ to na minnat-kash-e-jāñ hoñge
dil se nikleñge to vo ġhair ke armāñ hoñge

kahne-sunñe se vo taklīf-e-ayādat na kareñ
īsī-e-vaqt haiñ aa kar bhī pashemāñ hoñge

dil meñ rah rah ke khaTakte jo haiñ kāñToñ kī tarah
ġhāliban aap ke kho.e hue paikāñ hoñge

hāsil-e-ishq-o-mohabbat ġham-e-hijrāñ na sahī
vo kisī shoḳh ke bhūle hue paimāñ hoñge

laakh āzād sahī hazrat-e-'tālib' lekin
aap bhī qā.il-e-majbūrī-e-insāñ hoñge

jis qadar qalb ki taskin ke saman honge
karb afza-e-sukun-e-gham-e-hijran honge

arsa-e-hashr mein jo ishq ka unwan honge
meri hi KHak ke ajza-e-pareshan honge

ashk masum jo KHamyaza-e-isyan honge
wo bhi munjumla-e-saramaya-e-iman honge

mere arman to na minnat-kash-e-jaan honge
dil se niklenge to wo ghair ke arman honge

kahne-sunne se wo taklif-e-ayaadat na karen
isi-e-waqt hain aa kar bhi pasheman honge

dil mein rah rah ke khaTakte jo hain kanTon ki tarah
ghaaliban aap ke khoe hue paikan honge

hasil-e-ishq-o-mohabbat gham-e-hijran na sahi
wo kisi shoKH ke bhule hue paiman honge

lakh aazad sahi hazrat-e-'talib' lekin
aap bhi qail-e-majburi-e-insan honge

Source: