apnī hastī nazar aa.ī thī abhī
saañs se sham.a bujhā.ī thī abhī

kaun ho saktā hai aane vaalā
ek āvāz sī aa.ī thī abhī

ek sūrat thī ki dil hī dil meñ
ek sūrat se mil aa.ī thī abhī

saath apne vo ḳhudā thā koī
saath apne jo ḳhudā.ī thī abhī

sab kī āñkhoñ meñ nazar aane lagī
dil meñ sūrat jo chhupā.ī thī abhī

baat kahte hī zarā kho se ga.e
baat mushkil se banā.ī thī abhī

phir vafādār nazar aane lagā
bevafā jis se laḌā.ī thī abhī

apni hasti nazar aai thi abhi
sans se shama bujhai thi abhi

kaun ho sakta hai aane wala
ek aawaz si aai thi abhi

ek surat thi ki dil hi dil mein
ek surat se mil aai thi abhi

sath apne wo KHuda tha koi
sath apne jo KHudai thi abhi

sab ki aankhon mein nazar aane lagi
dil mein surat jo chhupai thi abhi

baat kahte hi zara kho se gae
baat mushkil se banai thi abhi

phir wafadar nazar aane laga
bewafa jis se laDai thi abhi

Source: Funoon(Jadeed Ghazal Number: Volume-002)