tamām umr jale aur raushnī nahīñ kī
ye zindagī hai to phir ham ne zindagī nahīñ kī

sitam to ye hai ki mere ḳhilāf bolte haiñ
vo log jin se kabhī maiñ ne baat bhī nahīñ kī

jo dil meñ aatā gayā sidq-e-dil se likhtā gayā
duā.eñ māñgī haiñ maiñ ne to shā.erī nahīñ kī

bas itnā hai ki mirā baḳht Dhal gayā aur phir
mire charāġh ne bhī mujh pe raushnī nahīñ kī

mirī sipāh se duniyā larazne lagtī hai
magar tumhārī to maiñ ne barābarī nahīñ kī

kuchh is liye bhī akelā sā ho gayā huuñ 'nadīm'
sabhī ko dost banāyā hai dushmanī nahīñ kī

tamam umr jale aur raushni nahin ki
ye zindagi hai to phir hum ne zindagi nahin ki

sitam to ye hai ki mere KHilaf bolte hain
wo log jin se kabhi main ne baat bhi nahin ki

jo dil mein aata gaya sidq-e-dil se likhta gaya
duaen mangi hain main ne to shaeri nahin ki

bas itna hai ki mera baKHt Dhal gaya aur phir
mere charagh ne bhi mujh pe raushni nahin ki

meri sipah se duniya larazne lagti hai
magar tumhaari to main ne barabari nahin ki

kuchh is liye bhi akela sa ho gaya hun 'nadim'
sabhi ko dost banaya hai dushmani nahin ki