fanā kā hosh aanā zindagī kā dard-e-sar jaanā
ajal kyā hai ḳhumār-e-bāda-e-hastī utar jaanā

azīzān-e-vatan ko ġhuncha o barg o samar jaanā
ḳhudā ko bāġhbāñ aur qaum ko ham ne shajar jaanā

urūs-e-jāñ nayā pairāhan-e-hastī badaltī hai
faqat tamhīd aane kī hai duniyā se guzar jaanā

musībat meñ bashar ke jauhar-e-mardāna khulte haiñ
mubārak buz-diloñ ko gardish-e-qismat se Dar jaanā

vo tab-e-yās-parvar ne mujhe chashm-e-aqīdat dī
ki shām-e-ġham kī tārīkī ko bhī nūr-e-sahar jaanā

bahut saudā rahā vaa.iz tujhe nār-e-jahannam kā
maza soz-e-mohabbat kā bhī kuchh ai be-ḳhabar jaanā

karishma ye bhī hai ai be-ḳhabar iflās-e-qaumī kā
talāsh-e-rizq meñ ahl-e-hunar kā dar-ba-dar jaanā

ajal kī niiñd meñ bhī ḳhvāb-e-hastī gar nazar aayā
to phir bekār hai tañg aa ke is duniyā se mar jaanā

vo saudā zindagī kā hai ki ġham insān sahtā hai
nahīñ to hai bahut āsān is jiine se mar jaanā

chaman-zār-e-mohabbbat meñ usī ne bāġhbānī kī
ki jis ne apnī mehnat ko hī mehnat kā samar jaanā

sidhārī manzil-e-hastī se kuchh be-e'tinā.ī se
tan-e-ḳhākī ko shāyad ruuh ne gard-e-safar jaanā

fana ka hosh aana zindagi ka dard-e-sar jaana
ajal kya hai KHumar-e-baada-e-hasti utar jaana

azizan-e-watan ko ghuncha o barg o samar jaana
KHuda ko baghban aur qaum ko hum ne shajar jaana

urus-e-jaan naya pairahan-e-hasti badalti hai
faqat tamhid aane ki hai duniya se guzar jaana

musibat mein bashar ke jauhar-e-mardana khulte hain
mubarak buz-dilon ko gardish-e-qismat se Dar jaana

wo tab-e-yas-parwar ne mujhe chashm-e-aqidat di
ki sham-e-gham ki tariki ko bhi nur-e-sahar jaana

bahut sauda raha waiz tujhe nar-e-jahannam ka
maza soz-e-mohabbat ka bhi kuchh ai be-KHabar jaana

karishma ye bhi hai ai be-KHabar iflas-e-qaumi ka
talash-e-rizq mein ahl-e-hunar ka dar-ba-dar jaana

ajal ki nind mein bhi KHwab-e-hasti gar nazar aaya
to phir bekar hai tang aa ke is duniya se mar jaana

wo sauda zindagi ka hai ki gham insan sahta hai
nahin to hai bahut aasan is jine se mar jaana

chaman-zar-e-mohabbbat mein usi ne baghbani ki
ki jis ne apni mehnat ko hi mehnat ka samar jaana

sidhaari manzil-e-hasti se kuchh be-e'tinai se
tan-e-KHaki ko shayad ruh ne gard-e-safar jaana