dar aap kā ham chhoḌ ke ab jaa.eñ kahāñ aur
hai tark-e-ta.alluq meñ ḳhud apnā hī ziyāñ aur

āsān uThānā na thā kuchh bār-e-ḳhilāfat
juz mere uThātā bhī koī bār-e-garāñ aur

dil hai ki koī chaub-e-tar-o-tāza-o-shādāb
jab aag sulagtī hai to uThtā hai dhuāñ aur

hai fasl-e-bahārāñ meñ chaman sho.ala-ba-dāmāñ
ab dekhiye kyā hotā hai andāz-e-ḳhizāñ aur

āzādī-e-guftār-o-ḳhayālāt kā iz.hār
barbādī ke ab is se bhī baḌh ke haiñ nishāñ aur

jab shīsha-e-dil par mire zañgār hai aatā
kyā kahiye chamaktā hai mirā dāġh-e-nihāñ aur

maiñ shāḳh-e-samar-dār ke mānind huuñ 'māhir'
miltā huuñ kisī se to vo kartā hai gumāñ aur

dar aap ka hum chhoD ke ab jaen kahan aur
hai tark-e-talluq mein KHud apna hi ziyan aur

aasan uThana na tha kuchh bar-e-KHilafat
juz mere uThata bhi koi bar-e-garan aur

dil hai ki koi chaub-e-tar-o-taza-o-shadab
jab aag sulagti hai to uThta hai dhuan aur

hai fasl-e-bahaaran mein chaman shoala-ba-daman
ab dekhiye kya hota hai andaz-e-KHizan aur

aazadi-e-guftar-o-KHayalat ka izhaar
barbaadi ke ab is se bhi baDh ke hain nishan aur

jab shisha-e-dil par mere zangar hai aata
kya kahiye chamakta hai mera dagh-e-nihan aur

main shaKH-e-samar-dar ke manind hun 'mahir'
milta hun kisi se to wo karta hai guman aur

Source: Aab-e-Baqa