Subscribe to our newsletter and get our newest updates

Takht Singh

  • Ghazal


har ashk teri yaad ka naqsh-e-kaf-e-pa hai


har ashk tirī yaad kā naqsh-e-kaf-e-pā hai
har aah tire pā-e-tasavvur kī sadā hai

har zarra meñ har phuul meñ ā.īna paḌā hai
har samt tire aks kā mahshar sā bapā hai

ik an-sunī āvāz sī aatī hai kahīñ se
ik paikar-e-mauhūm sar-e-dosh-e-havā hai

yuuñ jhiil meñ zau-rez tirā saaya hai maano
paanī kī añgūThī meñ nagīna sā jaḌā hai

pābandī-e-ādāb se hushiyār ki is meñ
har qahqaha naukā kī tarah Duub chukā hai

rahtā thā jahāñ dil meñ tire pyaar kā panchhī
us shāḳh par ab ujḌā huā ghoñsla sā hai

shāyad yahī sho.ala his-e-bātil kī ḳhabar le
ai dost sar-e-dār dhuāñ sā to uThā hai

shāyad maiñ sar-e-chashma-e-anvār khaḌā huuñ
hairāñ huuñ tā pā-e-nazar chāñd sā kyā hai

vo rañg tasavvur hai ki har zarra-e-jāñ se
ik ajnabī sā chehra mujhe ghuur rahā hai

kyuuñ phail chalā bazm-e-tamannā meñ dhuāñ sā
kyuuñ terī mohabbat kā diyā bujh sā gayā hai

har ashk teri yaad ka naqsh-e-kaf-e-pa hai
har aah tere pa-e-tasawwur ki sada hai

har zarra mein har phul mein aaina paDa hai
har samt tere aks ka mahshar sa bapa hai

ek an-suni aawaz si aati hai kahin se
ek paikar-e-mauhum sar-e-dosh-e-hawa hai

yun jhil mein zau-rez tera saya hai mano
pani ki anguThi mein nagina sa jaDa hai

pabandi-e-adab se hushiyar ki is mein
har qahqaha nauka ki tarah Dub chuka hai

rahta tha jahan dil mein tere pyar ka panchhi
us shaKH par ab ujDa hua ghonsla sa hai

shayad yahi shoala his-e-baatil ki KHabar le
ai dost sar-e-dar dhuan sa to uTha hai

shayad main sar-e-chashma-e-anwar khaDa hun
hairan hun ta pa-e-nazar chand sa kya hai

wo rang tasawwur hai ki har zarra-e-jaan se
ek ajnabi sa chehra mujhe ghur raha hai

kyun phail chala bazm-e-tamanna mein dhuan sa
kyun teri mohabbat ka diya bujh sa gaya hai


Source: Shab-e-Uriyan

Leave a comment

+