Subscribe to our newsletter and get our newest updates

Obaidullah Aleem

  • Ghazal


bahar ka dhan aata jata asal KHazana ghar mein hai


bāhar kā dhan aatā jaatā asal ḳhazāna ghar meñ hai
har dhuup meñ jo mujhe saayā de vo sachchā saayā ghar meñ hai

pātāl ke dukh vo kyā jāneñ jo sat.h pe haiñ milne vaale
haiñ ek havāla dost mire aur ek havāla ghar meñ hai

mirī umr ke ik ik lamhe ko maiñ ne qaid kiyā hai lafzoñ meñ
jo haarā huuñ yā jiitā huuñ vo sab sarmāya ghar meñ hai

tū nanhā-munnā ek diyā maiñ ek samundar añdhiyārā
tū jalte jalte bujhne lagā aur phir bhī añdherā ghar meñ hai

kyā svāñg bhare roTī ke liye izzat ke liye shohrat ke liye
suno shaam huī ab ghar ko chalo koī shaḳhs akelā ghar meñ hai

ik hijr-zada bābul piyārī tire jāgte bachchoñ se haarī
ai shā.er kis duniyā meñ hai tū tirī tanhā duniyā ghar meñ hai

duniyā meñ khapā.e saal ka.ī āḳhir meñ khulā ahvāl yahī
vo ghar kā ho yā bāhar kā har dukh kā mudāvā ghar meñ hai

bahar ka dhan aata jata asal KHazana ghar mein hai
har dhup mein jo mujhe saya de wo sachcha saya ghar mein hai

patal ke dukh wo kya jaanen jo sath pe hain milne wale
hain ek hawala dost mere aur ek hawala ghar mein hai

meri umr ke ek ek lamhe ko main ne qaid kiya hai lafzon mein
jo haara hun ya jita hun wo sab sarmaya ghar mein hai

tu nanha-munna ek diya main ek samundar andhiyara
tu jalte jalte bujhne laga aur phir bhi andhera ghar mein hai

kya swang bhare roTi ke liye izzat ke liye shohrat ke liye
suno sham hui ab ghar ko chalo koi shaKHs akela ghar mein hai

ek hijr-zada babul piyari tere jagte bachchon se haari
ai shaer kis duniya mein hai tu teri tanha duniya ghar mein hai

duniya mein khapae sal kai aaKHir mein khula ahwal yahi
wo ghar ka ho ya bahar ka har dukh ka mudawa ghar mein hai

Videos
This video is playing from YouTube Videos
This video is playing from YouTube Obaidullah Aleem Obaidullah Aleem RECITATIONS Fahad Husain



00:00/00:00 bahar ka dhan aata jata asal KHazana ghar mein hai Fahad Husain

Source: Book : Veeran sarai ka diya (Pg. 27)

Leave a comment

+