chaudhvāñ us chañdar kā saal huā
husn meñ badr bā-kamāl huā

tujh sā chanchal nahīñ zamāne meñ
ram meñ ai man hiran ġhazāl huā

bāġh-e-dil meñ tū naḳhl-e-tūbā hai
sarv tujh qad se pā.emāl huā

raat din tū rahe raqībāñ-sañg
dekhnā terā mujh muhāl huā

dekh kar tujh nayan kī shoḳhī kuuñ
thak ke sahrā-nashīñ ġhazāl huā

murġh-e-dil ke phañsāne ko mere
dāna-o-dām zulf o ḳhaal huā

zulf kī har shikan meñ tujh merā
dil giraftār baal baal huā

chaudhwan us chandar ka sal hua
husn mein badr ba-kamal hua

tujh sa chanchal nahin zamane mein
ram mein ai man hiran ghazal hua

bagh-e-dil mein tu naKHl-e-tuba hai
sarw tujh qad se paemal hua

raat din tu rahe raqiban-sang
dekhna tera mujh muhaal hua

dekh kar tujh nayan ki shoKHi kun
thak ke sahra-nashin ghazal hua

murgh-e-dil ke phansane ko mere
dana-o-dam zulf o KHal hua

zulf ki har shikan mein tujh mera
dil giraftar baal baal hua

Source: Book : Intekhab Kalam (Pg. 36)