Subscribe to our newsletter and get our newest updates

Fani Badayuni

  • Ghazal


KHalq kahti hai jise dil tere diwane ka


ḳhalq kahtī hai jise dil tire dīvāne kā
ek gosha hai ye duniyā isī vīrāne kā

ik muamma hai samajhne kā na samjhāne kā
zindagī kaahe ko hai ḳhvāb hai dīvāne kā

husn hai zaat mirī ishq sifat hai merī
huuñ to maiñ sham.a magar bhes hai parvāne kā

ka.abe ko dil kī ziyārat ke liye jaatā huuñ
āstāna hai haram mere sanam-ḳhāne kā

muḳhtasar qissa-e-ġham ye hai ki dil rakhtā huuñ
rāz-e-kaunain ḳhulāsa hai is afsāne kā

zindagī bhī to pashemāñ hai yahāñ lā ke mujhe
DhūñDtī hai koī hiila mire mar jaane kā

tum ne dekhā hai kabhī ghar ko badalte hue rañg
aao dekho na tamāshā mire ġham-ḳhāne kā

ab ise daar pe le jā ke sulā de saaqī
yuuñ bahaknā nahīñ achchhā tire mastāne kā

dil se pahuñchī to haiñ āñkhoñ meñ lahū kī būñdeñ
silsila shīshe se miltā to hai paimāne kā

haDDiyāñ haiñ ka.ī lipTī huī zanjīroñ meñ
liye jaate haiñ janāza tire dīvāne kā

vahdat-e-husn ke jalvoñ kī ye kasrat ai ishq
dil ke har zarre meñ aalam hai parī-ḳhāne kā

chashm-e-sāqī asar-e-mai se nahīñ hai gul-rañg
dil mire ḳhuun se labrez hai paimāne kā

lauh dil ko ġham-e-ulfat ko qalam kahte haiñ
kun hai andāz-e-raqam husn ke afsāne kā

ham ne chhānī haiñ bahut dair o haram kī galiyāñ
kahīñ paayā na Thikānā tire dīvāne kā

kis kī āñkheñ dam-e-āḳhir mujhe yaad aa.ī haiñ
dil muraqqa.a hai chhalakte hue paimāne kā

kahte haiñ kyā hī maze kā hai fasāna 'fānī'
aap kī jaan se duur aap ke mar jaane kā

har nafas umr-e-guzishta kī hai mayyat 'fānī'
zindagī naam hai mar mar ke jiye jaane kā

KHalq kahti hai jise dil tere diwane ka
ek gosha hai ye duniya isi virane ka

ek muamma hai samajhne ka na samjhane ka
zindagi kahe ko hai KHwab hai diwane ka

husn hai zat meri ishq sifat hai meri
hun to main shama magar bhes hai parwane ka

kabe ko dil ki ziyarat ke liye jata hun
aastana hai haram mere sanam-KHane ka

muKHtasar qissa-e-gham ye hai ki dil rakhta hun
raaz-e-kaunain KHulasa hai is afsane ka

zindagi bhi to pasheman hai yahan la ke mujhe
DhunDti hai koi hila mere mar jaane ka

tum ne dekha hai kabhi ghar ko badalte hue rang
aao dekho na tamasha mere gham-KHane ka

ab ise dar pe le ja ke sula de saqi
yun bahakna nahin achchha tere mastane ka

dil se pahunchi to hain aankhon mein lahu ki bunden
silsila shishe se milta to hai paimane ka

haDDiyan hain kai lipTi hui zanjiron mein
liye jate hain janaza tere diwane ka

wahdat-e-husn ke jalwon ki ye kasrat ai ishq
dil ke har zarre mein aalam hai pari-KHane ka

chashm-e-saqi asar-e-mai se nahin hai gul-rang
dil mere KHun se labrez hai paimane ka

lauh dil ko gham-e-ulfat ko qalam kahte hain
kun hai andaz-e-raqam husn ke afsane ka

hum ne chhani hain bahut dair o haram ki galiyan
kahin paya na Thikana tere diwane ka

kis ki aankhen dam-e-aKHir mujhe yaad aai hain
dil muraqqa hai chhalakte hue paimane ka

kahte hain kya hi maze ka hai fasana 'fani'
aap ki jaan se dur aap ke mar jaane ka

har nafas umr-e-guzishta ki hai mayyat 'fani'
zindagi nam hai mar mar ke jiye jaane ka

Videos
This video is playing from YouTube Videos
This video is playing from YouTube Hamid Ali Khan

Leave a comment

+