bahut ḳhush the sāhil qarīb aa gayā
safīna kināre se Takrā gayā

hai behad ḳhatarnāk bahr-e-jahāñ
jo insān bhī is meñ Duubā gayā

tire Dar se chhup-chhup ke piite the ham
gayā shaiḳh ab vo zamāna gayā

mujhe zindagī kī duā.eñ na do
maiñ aisī duāoñ se uktā gayā

na samho kisī kī kisī baat ko
tumheñ kaun ye baat samjhā gayā

vafā.eñ nahīñ vo jafā.eñ nahīñ
nizām-e-jahāñ kuchh badal sā gayā

ye chhup chhup ke milnā bhī hai ik azaab
koī aa gayā vo koī aa gayā

yahāñ the to 'sarshār' kyā kuchh na the
ga.e vo to ḳhat bhī na bhejā gayā

bahut KHush the sahil qarib aa gaya
safina kinare se Takra gaya

hai behad KHatarnak bahr-e-jahan
jo insan bhi is mein Duba gaya

tere Dar se chhup-chhup ke pite the hum
gaya shaiKH ab wo zamana gaya

mujhe zindagi ki duaen na do
main aisi duaon se ukta gaya

na samho kisi ki kisi baat ko
tumhein kaun ye baat samjha gaya

wafaen nahin wo jafaen nahin
nizam-e-jahan kuchh badal sa gaya

ye chhup chhup ke milna bhi hai ek azab
koi aa gaya wo koi aa gaya

yahan the to 'sarshaar' kya kuchh na the
gae wo to KHat bhi na bheja gaya