bas tere liye udaas āñkheñ
uf maslahat nā-shanās āñkheñ

be-nūr huī haiñ dhīre dhīre
aa.iiñ nahīñ mujh ko raas āñkheñ

āḳhir ko gayā vo kaash ruktā
kartī rahīñ iltimās āñkheñ

ḳhvābīda haqīqatoñ kī maarī
pāmāl aur bad-havās āñkheñ

darpesh junūñ kā marhala aur
faaqa hai badan to pyaas āñkheñ

bas tere liye udas aankhen
uf maslahat na-shanas aankhen

be-nur hui hain dhire dhire
aain nahin mujh ko ras aankhen

aaKHir ko gaya wo kash rukta
karti rahin iltimas aankhen

KHwabida haqiqaton ki mari
pamal aur bad-hawas aankhen

darpesh junun ka marhala aur
faqa hai badan to pyas aankhen