kise ḳhabar hai ki umr bas us pe ġhaur karne meñ kaT rahī hai
ki ye udāsī hamāre jismoñ se kis ḳhushī meñ lipaT rahī hai

ajiib dukh hai ham us ke ho kar bhī us ko chhūne se Dar rahe haiñ
ajiib dukh hai hamāre hisse kī aag auroñ meñ baT rahī hai

maiñ us ko har roz bas yahī ek jhuuT sunñe ko phone kartā
suno yahāñ koī mas.ala hai tumhārī āvāz kaT rahī hai

mujh aise peḌoñ ke sūkhne aur sabz hone se kyā kisī ko
ye bel shāyad kisī musībat meñ hai jo mujh se lipaT rahī hai

ye vaqt aane pe apnī aulād apne ajdād bech degī
jo fauj dushman ko apnā sālār girvī rakh kar palaT rahī hai

so is ta.alluq meñ jo ġhalat-fahmiyāñ thiiñ ab duur ho rahī haiñ
rukī huī gāḌiyoñ ke chalne kā vaqt hai dhuñdh chhaT rahī hai

kise KHabar hai ki umr bas us pe ghaur karne mein kaT rahi hai
ki ye udasi hamare jismon se kis KHushi mein lipaT rahi hai

ajib dukh hai hum us ke ho kar bhi us ko chhune se Dar rahe hain
ajib dukh hai hamare hisse ki aag auron mein baT rahi hai

main us ko har roz bas yahi ek jhuT sunne ko phone karta
suno yahan koi masala hai tumhaari aawaz kaT rahi hai

mujh aise peDon ke sukhne aur sabz hone se kya kisi ko
ye bel shayad kisi musibat mein hai jo mujh se lipaT rahi hai

ye waqt aane pe apni aulad apne ajdad bech degi
jo fauj dushman ko apna salar girwi rakh kar palaT rahi hai

so is talluq mein jo ghalat-fahmiyan thin ab dur ho rahi hain
ruki hui gaDiyon ke chalne ka waqt hai dhundh chhaT rahi hai

Videos
This video is playing from YouTube Videos
This video is playing from YouTube Tahzeeb Hafi