ise maiñ aur ye merā asā hī tai karegā
ye rāh-e-ishq mirā hausla hī tai karegā

shab-e-siyāh ke dāman meñ haiñ guhar kyā kiyā
nasīb vāle! tirā ratjagā hī tai karegā

samundaroñ se mah-e-chār-dah kā khel hai kyā
koī khilāḌī koī mah-laqā hī tai karegā

hamārā dil hai kisī kaam kā ki nākāra
ye amr aaj ki kal dil-rubā hī tai karegā

haiñ shīsha-kash hameñ kyā kaam kār-e-duniyā se
ye rāh-e-saḳht koī dūsrā hī tai karegā

ilaaj un kaa, jo haiñ is zamīñ kā bojh, miyāñ!
koī ḳharosh koī zalzala hī tai karegā

jo hāl-mast haiñ gam-karda-rāh bhī unheñ kyā
ki road-map koī dūsrā hī tai karegā

bajā.e ḳhvāj-gāñ masnad-nashīñ hoñ ḳhvāja-sarā
to mas.ala koī ḳhvāja-sarā hī tai karegā

ilaaj kyā ho shaġhāloñ kā bad-sagāloñ kā
ye sher-e-nar kā koī hamhama hī tai karegā

tamām shahr kī jab be-hisī ho sikka-e-vaqt
to mol-tol koī masḳhara hī tai karegā

ye tai huā hai ki sher o adab ke paimāne
hamāre shahr kā ik yak-fanā hī tai karegā

mujhe halāk kiyā kis ne aur kyuuñ kis vaqt
ye sab muāmlā roz-e-jazā hī tai karegā

ise main aur ye mera asa hi tai karega
ye rah-e-ishq mera hausla hi tai karega

shab-e-siyah ke daman mein hain guhar kya kiya
nasib wale! tera ratjaga hi tai karega

samundaron se mah-e-chaar-dah ka khel hai kya
koi khilaDi koi mah-laqa hi tai karega

hamara dil hai kisi kaam ka ki nakara
ye amr aaj ki kal dil-ruba hi tai karega

hain shisha-kash hamein kya kaam kar-e-duniya se
ye rah-e-saKHt koi dusra hi tai karega

ilaj un ka, jo hain is zamin ka bojh, miyan!
koi KHarosh koi zalzala hi tai karega

jo haal-mast hain gam-karda-rah bhi unhen kya
ki road-map koi dusra hi tai karega

bajae KHwaj-gan masnad-nashin hon KHwaja-sara
to masala koi KHwaja-sara hi tai karega

ilaj kya ho shaghaalon ka bad-sagalon ka
ye sher-e-nar ka koi hamhama hi tai karega

tamam shahr ki jab be-hisi ho sikka-e-waqt
to mol-tol koi masKHara hi tai karega

ye tai hua hai ki sher o adab ke paimane
hamare shahr ka ek yak-fana hi tai karega

mujhe halak kiya kis ne aur kyun kis waqt
ye sab muamla roz-e-jaza hi tai karega

Source: Book : Shakh-e-Zaryab (Pg. 49)