naqd-e-dil hai ki garebān ke har taar meñ hai
hausla ab bhī bahut tere ḳharīdār meñ hai
yaañ koī sho.ala-ba-jāñ aur bhī Thahrā hogā
kis qayāmat kī tapish sāya-e-dīvār meñ hai
kitnā miltā hai mire qalb kī kaifiyyat se
ye jo hañgāma tire kūcha-o-bāzār meñ hai
zaḳhm ehsās ko jo zahr harā hī rakkhe
teġh-e-āhan meñ nahīñ baat kī talvār meñ hai
saare gulshan ko jalāne ke liye kaafī hai
ek sho.ala jo dil murġh-e-giraftār meñ hai
zāmin nashv-o-numā-e-gul-e-tar hai ai 'dil'
dard-mandī kī ḳhalish sī jo dil-e-ḳhār meñ hai
naqd-e-dil hai ki gareban ke har tar mein hai
hausla ab bhi bahut tere KHaridar mein hai
yan koi shoala-ba-jaan aur bhi Thahra hoga
kis qayamat ki tapish saya-e-diwar mein hai
kitna milta hai mere qalb ki kaifiyyat se
ye jo hangama tere kucha-o-bazar mein hai
zaKHm ehsas ko jo zahr hara hi rakkhe
tegh-e-ahan mein nahin baat ki talwar mein hai
sare gulshan ko jalane ke liye kafi hai
ek shoala jo dil murgh-e-giraftar mein hai
zamin nashw-o-numa-e-gul-e-tar hai ai 'dil'
dard-mandi ki KHalish si jo dil-e-KHar mein hai
Source: Book : Aaina-e-Dil (Pg. 44) Author : Dil Ayubi Publication : Nazish Book Center Lahore (1995) Edition : 1995
Leave a comment