be-chārgī-e-hasrat-e-dīdār dekhnā
mushkil na dekhnā hai to dushvār dekhnā
lamhāt-e-intizār kī raftār dekhnā
vo baar baar sāya-e-dīvār dekhnā
yuuñ dekhnā ki TuuTe na rishta nigāh kā
ik baar dekhne meñ vo sau baar dekhnā
yā sub.h hī se shaam kā pur-kaif intizār
yā shaam hī se sub.h ke āsār dekhnā
kyā dil-fareb hai tire ḳhvāb-e-girāñ kā husn
tujh se nihāñ tire lab-o-ruḳhsār dekhnā
dard-e-firāq kī sahar-e-avvalīñ 'hafīz'
uThte hī jānib-e-dar-o-dīvār dekhnā
be-chaargi-e-hasrat-e-didar dekhna
mushkil na dekhna hai to dushwar dekhna
lamhat-e-intizar ki raftar dekhna
wo bar bar saya-e-diwar dekhna
yun dekhna ki TuTe na rishta nigah ka
ek bar dekhne mein wo sau bar dekhna
ya subh hi se sham ka pur-kaif intizar
ya sham hi se subh ke aasar dekhna
kya dil-fareb hai tere KHwab-e-giran ka husn
tujh se nihan tere lab-o-ruKHsar dekhna
dard-e-firaq ki sahar-e-awwalin 'hafiz'
uThte hi jaanib-e-dar-o-diwar dekhna
Source: Book : Naya daur (Pg. 238) Author : Qamar Sultana
Leave a comment