dikhāte haiñ jo ye sanam dekhte haiñ
ḳhudā kī ḳhudā.ī ko ham dekhte haiñ

ye haivān hai dast-e-tāle.a pe bhārī
na.e jānvar kā qadam dekhte haiñ

zan-o-ḳhvesh-o-farzand-o-daulat se chhūTe
na dekhe koī jo ki ham dekhte haiñ

shahanshāh ham haiñ diloñ par haiñ hākim
gadā tum ko ai zī-hasham dekhte haiñ

faqat haath kaale nahīñ balki mun.im
diloñ par bhī dāġh-e-varam dekhte haiñ

kahāñ tak utartī hai siine pe mere
tirī teġh-e-abrū kā dam dekhte haiñ

bhagātī hai mār-e-siyah go ki ham ko
tirī zulf-e-mushkīñ kā sam dekhte haiñ

zamīñ par bhī detā nahīñ chain ham ko
falak tujh se jaur-o-sitam dekhte haiñ

dur-e-ashk se merā bhartī hai dāman
saḳhī tujh ko ai chashm-e-nam dekhte haiñ

na rañj aur na shādī tavassut hai ham ko
ki aish-o-alam bhī baham dekhte haiñ

kisī maah ne us ko dhokā diyā hai
ham 'aḳhtar' ko kyuuñ pur-alam dekhte haiñ

dikhate hain jo ye sanam dekhte hain
KHuda ki KHudai ko hum dekhte hain

ye haiwan hai dast-e-talea pe bhaari
nae jaanwar ka qadam dekhte hain

zan-o-KHwesh-o-farzand-o-daulat se chhuTe
na dekhe koi jo ki hum dekhte hain

shahanshah hum hain dilon par hain hakim
gada tum ko ai zi-hasham dekhte hain

faqat hath kale nahin balki munim
dilon par bhi dagh-e-waram dekhte hain

kahan tak utarti hai sine pe mere
teri tegh-e-abru ka dam dekhte hain

bhagati hai mar-e-siyah go ki hum ko
teri zulf-e-mushkin ka sam dekhte hain

zamin par bhi deta nahin chain hum ko
falak tujh se jaur-o-sitam dekhte hain

dur-e-ashk se mera bharti hai daman
saKHi tujh ko ai chashm-e-nam dekhte hain

na ranj aur na shadi tawassut hai hum ko
ki aish-o-alam bhi baham dekhte hain

kisi mah ne us ko dhoka diya hai
hum 'aKHtar' ko kyun pur-alam dekhte hain

Source: Intikhab-e-wajid ali shah akhtar