dard ḳhāmosh rahā TūTtī āvāz rahī
merī har shaam tirī yaad kī hamrāz rahī

shahar meñ jab bhī chale ThanDī huā ke jhoñke
tapte sahrā kī tabī.at baḌī nā-sāz rahī

aa.ine TuuT ga.e aks kī sachchā.ī par
aur sachchā.ī hamesha kī tarah raaz rahī

ik na.e moḌ pe us ne bhī mujhe chhoḌ diyā
jis kī āvāz meñ shāmil mirī āvāz rahī

suntā rahtā huuñ buzurgoñ se maiñ akasr 'tāhir'
vo samā.at hī rahī aur na vo āvāz rahī

dard KHamosh raha TuTti aawaz rahi
meri har sham teri yaad ki hamraaz rahi

shahar mein jab bhi chale ThanDi hua ke jhonke
tapte sahra ki tabiat baDi na-saz rahi

aaine TuT gae aks ki sachchai par
aur sachchai hamesha ki tarah raaz rahi

ek nae moD pe us ne bhi mujhe chhoD diya
jis ki aawaz mein shamil meri aawaz rahi

sunta rahta hun buzurgon se main akasr 'tahir'
wo samaat hi rahi aur na wo aawaz rahi

Source: Book : Kashkol (Pg. 47) Author : Tahir Faraz Publication : Isteara Publications (2004) Edition : 2004