maujūd the abhī abhī rū-posh ho ga.e
ai mast-e-nāz tum to mire hosh ho ga.e

sote meñ vo jo mujh se ham-āġhosh ho ga.e
jitne gile the ḳhvāb-e-farāmosh ho ga.e

va.ade kī raat aa.ī qazā is adā ke saath
dhoke meñ tere us se ham-āġhosh ho ga.e

barsoñ hue na tum ne kiyā bhuul kar bhī yaad
va.ade kī tarah ham bhī farāmosh ho ga.e

āñkhoñ meñ bhī jo aa.e to allāh-re hijāb
ban kar nazar nazar se vo rū-posh ho ga.e

kyā kyā zabāñ-darāz charāġh anjuman meñ the
dāman-kashāñ tum aa.e to ḳhāmosh ho ga.e

yārān-e-rafta baat kā dete nahīñ javāb
kyā kah diyā fazā ne ki ḳhāmosh ho ga.e

aa.ī shab-e-visāl to niiñd aa ga.ī unheñ
ham hosh meñ jo aa.e vo mad.hosh ho ga.e

mar kar tamām sar se Talīñ āfateñ 'jalīl'
ham jaan de ke sab se subuk-dosh ho ga.e

maujud the abhi abhi ru-posh ho gae
ai mast-e-naz tum to mere hosh ho gae

sote mein wo jo mujh se ham-aghosh ho gae
jitne gile the KHwab-e-faramosh ho gae

wade ki raat aai qaza is ada ke sath
dhoke mein tere us se ham-aghosh ho gae

barson hue na tum ne kiya bhul kar bhi yaad
wade ki tarah hum bhi faramosh ho gae

aankhon mein bhi jo aae to allah-re hijab
ban kar nazar nazar se wo ru-posh ho gae

kya kya zaban-daraaz charagh anjuman mein the
daman-kashan tum aae to KHamosh ho gae

yaran-e-rafta baat ka dete nahin jawab
kya kah diya faza ne ki KHamosh ho gae

aai shab-e-visal to nind aa gai unhen
hum hosh mein jo aae wo madhosh ho gae

mar kar tamam sar se Talin aafaten 'jalil'
hum jaan de ke sab se subuk-dosh ho gae

Source: Book : Kainat-e-Jalil Manakpuri (Pg. 100)