ḳhud ko na ai bashar kabhī qismat pe chhoḌ tū
dariyā kī tej dhaar ko himmat se moḌ tū

is zindagī kī raah meñ dushvāriyāñ bhī haiñ
rahbar kā haath chhoḌ na rishtoñ ko toḌ tū

duniyā kī har bulandī ko hai terā intizār
ehsās-e-nā-rasā.ī kī gardan maroḌ tū

mehnat ke dam pe kyā nahīñ kar saktā aadmī
apne lahū kā āḳhirī qatra nichoḌ tū

jo kuchh hai tere paas vahī kaam aa.egā
bārish kī aas meñ kabhī maTkī na phoḌ tū

man kī ḳhushī milegī tū ye nek kaam kar
TuuTe hue diloñ ko kisī tarah jaḌe tū

do-gaz kafan hī ant meñ sab kā nasīb hai
ab chhoḌ bhī 'dinesh' ye daulat kī hoḌ tū

KHud ko na ai bashar kabhi qismat pe chhoD tu
dariya ki tej dhaar ko himmat se moD tu

is zindagi ki rah mein dushwariyan bhi hain
rahbar ka hath chhoD na rishton ko toD tu

duniya ki har bulandi ko hai tera intizar
ehsas-e-na-rasai ki gardan maroD tu

mehnat ke dam pe kya nahin kar sakta aadmi
apne lahu ka aaKHiri qatra nichoD tu

jo kuchh hai tere pas wahi kaam aaega
barish ki aas mein kabhi maTki na phoD tu

man ki KHushi milegi tu ye nek kaam kar
TuTe hue dilon ko kisi tarah jaDe tu

do-gaz kafan hi ant mein sab ka nasib hai
ab chhoD bhi 'dinesh' ye daulat ki hoD tu