aane vaalī thī ḳhizāñ maidān ḳhālī kar diyā
kal havā-e-shab ne saarā lawn ḳhālī kar diyā

ham tire ḳhvāboñ kī jannat se nikal kar aa ga.e
dekh terā qasr-e-ālī-shān ḳhālī kar diyā

dushmanoñ ne shust bāñdhī ḳhema-e-ummīd par
dostoñ ne darra-e-imkān ḳhālī kar diyā

bāñTne niklā hai vo phūloñ ke tohfe shahr meñ
is ḳhabar par ham ne bhī gul-dān ḳhālī kar diyā

le gayā vo saath apne dil kī saarī raunaqeñ
kis qadar ye shahr thā gunjān ḳhālī kar diyā

saarī chiḌiyāñ uḌ ga.iiñ mujh ko akelā chhoḌ kar
mere ghar kā sehn aur dālān ḳhālī kar diyā

Diary meñ saare achchhe sher chun kar likh liye
ek laḌkī ne mirā dīvān ḳhālī kar diyā

aane wali thi KHizan maidan KHali kar diya
kal hawa-e-shab ne sara lawn KHali kar diya

hum tere KHwabon ki jannat se nikal kar aa gae
dekh tera qasr-e-ali-shan KHali kar diya

dushmanon ne shust bandhi KHema-e-ummid par
doston ne darra-e-imkan KHali kar diya

banTne nikla hai wo phulon ke tohfe shahr mein
is KHabar par hum ne bhi gul-dan KHali kar diya

le gaya wo sath apne dil ki sari raunaqen
kis qadar ye shahr tha gunjaan KHali kar diya

sari chiDiyan uD gain mujh ko akela chhoD kar
mere ghar ka sehn aur dalan KHali kar diya

Diary mein sare achchhe sher chun kar likh liye
ek laDki ne mera diwan KHali kar diya