sarhad-e-jalva se jo aage nikal jā.egī
vo nazar jurm-rasā.ī kī sazā pā.egī
chashm-e-sāqī na kahīñ apnā bharam kho baiThe
aur kab tak ye mirī pyaas ko bahlā.egī
jo nazar guzrī hai tapte hue nazzāroñ se
kyā tasavvur kī ghanī chhāñv meñ so jā.egī
kyuuñ raheñ shahr bhī faizān-e-junūñ se mahrūm
aql dīvānoñ pe patthar hī to barsā.egī
hai ḳhizāñ mausam-e-afsurda-nigāhī kā naam
bujh gayā shauq to har shāḳh jhulas jā.egī
sarhad-e-jalwa se jo aage nikal jaegi
wo nazar jurm-rasai ki saza paegi
chashm-e-saqi na kahin apna bharam kho baiThe
aur kab tak ye meri pyas ko bahlaegi
jo nazar guzri hai tapte hue nazzaron se
kya tasawwur ki ghani chhanw mein so jaegi
kyun rahen shahr bhi faizan-e-junun se mahrum
aql diwanon pe patthar hi to barsaegi
hai KHizan mausam-e-afsurda-nigahi ka nam
bujh gaya shauq to har shaKH jhulas jaegi
Source: Book : Kalam-e-aizaz afzal (Pg. 123) Author : Aizaz Afzal Publication : Usmania Book Depot
Leave a comment