bād-e-sarsar hai nasīm-e-gulistāñ mere liye
ban gayā kunj-e-qafas ab āshiyāñ mere liye

zāhido tum ko mubārak ḳhāna-ka.aba rahe
kaafī hai sajde ko sañg-e-āstāñ mere liye

sāġhar-o-mīnā subū-o-jām kā ab zikr kyā
dushman-e-jāñ ho gayā pīr-e-muġhāñ mere liye

vaah re gardūn-e-gardāñ terā shauq-e-intizām
ho ga.ī hai zindagī bār-e-garāñ mere liye

dard-e-dil kahne ko aayā huuñ sarāpā dard huuñ
ho atā kuchh vaqt bahr-e-dāstāñ mere liye

hasrat-e-sozāñ se taktī hai use barq-e-tapāñ
shāḳh-e-gulshan par banā jo āshiyāñ mere liye

baad-e-sarsar hai nasim-e-gulistan mere liye
ban gaya kunj-e-qafas ab aashiyan mere liye

zahido tum ko mubarak KHana-kaba rahe
kafi hai sajde ko sang-e-astan mere liye

saghar-o-mina subu-o-jam ka ab zikr kya
dushman-e-jaan ho gaya pir-e-mughan mere liye

wah re gardun-e-gardan tera shauq-e-intizam
ho gai hai zindagi bar-e-garan mere liye

dard-e-dil kahne ko aaya hun sarapa dard hun
ho ata kuchh waqt bahr-e-dastan mere liye

hasrat-e-sozan se takti hai use barq-e-tapan
shaKH-e-gulshan par bana jo aashiyan mere liye

Source: Book : Nuquush-e-daaG (Pg. 100) Author : Sahir Hoshiyarpuri Publication : Haryana Urdu Acadami (1992) Edition : 1992