maiñ us kī mohabbat se ik din bhī mukar jaatā
kuchh aur nahīñ hotā is dil se utar jaatā

jis shaam giraftārī qismat meñ mirī aa.ī
us shaam kī lazzat se maiñ aur bikhar jaatā

ḳhushbū ke ta.āqub ne zanjīr kiyā mujh ko
varna to yahāñ se maiñ chup-chāp guzar jaatā

āvāz samā.at tak pahuñchī hī nahīñ shāyad
vo varna tasallī ko kuchh der Thahar jaatā

zehnoñ ke marāsim the ik saath bhī ho jaate
ik raah agar koī dīvār meñ kar jaatā

tāsīr nahīñ rahtī alfāz kī bandish meñ
maiñ sach jo nahīñ kahtā lahje kā asar jaatā

ab tere bichhaḌne se ye baat khulī mujh par
to jaan agar hotā maiñ jaañ se guzar jaatā

dil ham ne 'azīm' apnā āseb-zada rakkhā
jo ḳhvāb janm letā vo ḳhauf se mar jaatā

main us ki mohabbat se ek din bhi mukar jata
kuchh aur nahin hota is dil se utar jata

jis sham giraftari qismat mein meri aai
us sham ki lazzat se main aur bikhar jata

KHushbu ke taaqub ne zanjir kiya mujh ko
warna to yahan se main chup-chap guzar jata

aawaz samaat tak pahunchi hi nahin shayad
wo warna tasalli ko kuchh der Thahar jata

zehnon ke marasim the ek sath bhi ho jate
ek rah agar koi diwar mein kar jata

tasir nahin rahti alfaz ki bandish mein
main sach jo nahin kahta lahje ka asar jata

ab tere bichhaDne se ye baat khuli mujh par
to jaan agar hota main jaan se guzar jata

dil hum ne 'azim' apna aaseb-zada rakkha
jo KHwab janm leta wo KHauf se mar jata