Subscribe to our newsletter and get our newest updates

Dagh Dehlvi

  • Ghazal


abhi hamari mohabbat kisi ko kya malum


abhī hamārī mohabbat kisī ko kyā ma.alūm
kisī ke dil kī haqīqat kisī ko kyā ma.alūm

yaqīñ to ye hai vo ḳhat kā javāb likkheñge
magar navishta-e-qismat kisī ko kyā ma.alūm

ba-zāhir un ko hayā-dār log samjhe haiñ
hayā meñ jo hai sharārat kisī ko kyā ma.alūm

qadam qadam pe tumhāre hamāre dil kī tarah
basī huī hai qayāmat kisī ko kyā ma.alūm

ye rañj o aish hue hijr o vasl meñ ham ko
kahāñ hai dozaḳh o jannat kisī ko kyā ma.alūm

jo saḳht baat sune dil to TuuT jaatā hai
is ā.īñe kī nazākat kisī ko kyā ma.alūm

kiyā kareñ vo sunāne ko pyaar kī bāteñ
unheñ hai mujh se adāvat kisī ko kyā ma.alūm

ḳhudā kare na phañse dām-e-ishq meñ koī
uThā.ī hai jo musībat kisī ko kyā ma.alūm

abhī to fitne hī barpā kiye haiñ aalam meñ
uThā.eñge vo qayāmat kisī ko kyā ma.alūm

janāb-e-'dāġh' ke mashrab ko ham se to pūchho
chhupe hue haiñ ye hazrat kisī ko kyā ma.alūm

abhi hamari mohabbat kisi ko kya malum
kisi ke dil ki haqiqat kisi ko kya malum

yaqin to ye hai wo KHat ka jawab likkhenge
magar nawishta-e-qismat kisi ko kya malum

ba-zahir un ko haya-dar log samjhe hain
haya mein jo hai shararat kisi ko kya malum

qadam qadam pe tumhaare hamare dil ki tarah
basi hui hai qayamat kisi ko kya malum

ye ranj o aish hue hijr o wasl mein hum ko
kahan hai dozaKH o jannat kisi ko kya malum

jo saKHt baat sune dil to TuT jata hai
is aaine ki nazakat kisi ko kya malum

kiya karen wo sunane ko pyar ki baaten
unhen hai mujh se adawat kisi ko kya malum

KHuda kare na phanse dam-e-ishq mein koi
uThai hai jo musibat kisi ko kya malum

abhi to fitne hi barpa kiye hain aalam mein
uThaenge wo qayamat kisi ko kya malum

janab-e-'dagh' ke mashrab ko hum se to puchho
chhupe hue hain ye hazrat kisi ko kya malum

Videos
This video is playing from YouTube Videos
This video is playing from YouTube Ahmad Husain, Mohammad Husain Unknown

Source: Book : Kulliyat-e-daag(mehtaab-e-daag) (Pg. 717) Book : Kulliyat-e-daag(mehtaab-e-daag) (Pg. 117)

Leave a comment

+